Улсын Их Хурлын гишүүн, Боловсрол, шинжлэх ухааны дэд хорооны дарга С.Зулпхар, Улсын Их Хурлын гишүүн Ж.Галбадрах, Д.Бум-Очир, Б.Хэрлэн нар  хоёрдугаар сарын 9, 13-ны өдрүүдэд шинжлэх ухааны салбарын Мал эмнэлгийн эрдэм шинжилгээний хүрээлэн, Мал аж ахуйн эрдэм шинжилгээний хүрээлэн, Шинжлэх ухааны академийн Археологи, Физик технологи, Геологи, Биологийн хүрээлэнгүүдэд ажиллаж, батлагдсан хууль тогтоомжийн хэрэгжилт болон салбарын тулгамдсан асуудлаар холбогдох албаныхантай уулзлаа.

Улсын Их Хурлаас 2024 онд Шинжлэх ухаан, технологийн тухай хуулийн шинэчилсэн найруулгыг баталж, шинжлэх ухааны салбарын бодлогыг нийгэм, эдийн засгийн хөгжилтэй уялдуулах эрх зүйн орчныг бүрдүүлсэн бөгөөд “Монгол Улсыг 2026–2030 онд хөгжүүлэх таван жилийн үндсэн чиглэл”-ийн төсөлд шинжлэх ухааны салбарын дунд хугацааны хөгжлийн зорилго, хүрэх үр дүн, шалгуур үзүүлэлтийг анх удаа тодорхойлсон юм.

Энэ хүрээнд шинжлэх ухаан, технологийн салбарын зардлыг үе шаттай нэмэгдүүлж, 2030 он гэхэд дотоодын нийт бүтээгдэхүүнийг хоёр хувьд хүргэх зорилт дэвшүүлэн ажиллаж байна. Судлаачдын зүгээс сүүлийн 30 гаруй жилийн хугацаанд салбарын санхүүжилт, хөрөнгө оруулалт хангалтгүй байсан талаар танилцуулав. Тодруулбал, 2024 оны байдлаар шинжлэх ухааны салбарын зардал дотоодын нийт бүтээгдхүүнд эзлэх хувиар дэлхийн дунджаас 20 дахин бага, эрдэм шинжилгээний ажилтны цалин улсын дунджаас 1.75 дахин доогуур байгаа нь мэргэшсэн хүний нөөц гадагшлах гол шалтгаан болж байгааг дурдлаа.

Санхүүжилт, хүний нөөцийн хүрэлцээ, цалин хөлс, нийгмийн баталгааны асуудлаас шалтгаалан судалгаа, хөгжүүлэлтийн ажлын цар хүрээ, үр дүн хязгаарлагдмал хэвээр байгаа бөгөөд шинжлэх ухааны үр өгөөжийг улс орны хөгжилд бодитой ашиглах боломжийг бууруулж байгааг тэмдэглэв. Мөн судалгааны байгууллагуудад техник, тоног төхөөрөмжийн шинэчлэл хийх, барилга байгууламжийн засвар, сайжруулалт шаардлагатай байгааг онцолсон юм гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.