Төв Азийн бүс нутгийн эдийн засгийн хамтын ажиллагааны (КАРЕК) хөтөлбөрийн гишүүн Монгол, Хятад, Казахстан, Узбекистан, Киргиз, Пакистан, Тажикстан, Туркменистан болон Гүрж гэсэн есөн улсын хооронд байгуулахаар хэлэлцэж буй Худалдаа, хөрөнгө оруулалтыг хөнгөвчлөх түншлэлийн хэлэлцээр (КАРТИФ)-ийн хоёрдугаар шатны хэлэлцээ 2026 оны 11 дүгээр сарын 6-ны өдөр Филиппин Улсын Манила хотноо хэлэлцээний багийн ахлагч нарын түвшинд зохион байгуулагдлаа.

Тус хэлэлцээгээр талууд КАРТИФ-ийн ерөнхий хэлэлцээрийн төслийн саналын зөрүүтэй асуудлуудаар байр сууриа ойртуулж, нийлүүлэлтийн сүлжээний холболт, үйлчилгээний дотоод зохицуулалт, хөрөнгө оруулалтыг хөнгөвчлөх протоколуудын төслийг эцэслэн тохиролцох чиглэлээр тодорхой ахиц гаргав.

Монголын талын хэлэлцээний багийн ахлагч, Эдийн засаг, хөгжлийн дэд сайд С.Даваасүрэн хэлэлцээнд оролцож, Монгол Улсын байр суурийг илэрхийлэн, далайд гарцгүй орнуудын болон үндэсний эрх ашигт нийцсэн зохицуулалтуудыг хэлэлцээрийн төсөлд тусгахаар санал дэвшүүлж ажиллав.

Монгол Улсын Засгийн газрын 2026 оны 6 дугаар сарын 3-ны өдрийн хуралдаанаар хэлэлцэн дэмжсэний дагуу КАРТИФ-ийн албан ёсны хэлэлцээг эхлүүлсэн бөгөөд нэгдүгээр шатны хэлэлцээ 2026 оны 9, 10 дугаар саруудад цахим хэлбэрээр зохион байгуулагдсан. КАРТИФ хэлэлцээр байгуулагдсанаар тарифын бус саад тотгорыг бууруулах, хил, гааль, логистикийн үйл ажиллагааны үр ашгийг сайжруулах, экспортын төрөлжилт, өрсөлдөх чадварыг нэмэгдүүлэх, бүс нутгийн нийлүүлэлтийн сүлжээнд Монгол Улсын оролцоог өргөжүүлэх боломж бүрдэх юм.