Улс төрийн намын тухай хуульд зааснаар нийт сонгогчийн нэг ба түүнээс дээш хувийн санал авсан нам нь сонгуулийн бусад жилд төрөөс үзүүлэх шууд бус дэмжлэгийг авах эрхтэй.

Тодруулбал, намын удирдах дээд байгууллагыг хуралдуулах, гишүүд, дэмжигчидтэй хийх уулзалт, хурал зохион байгуулах, иргэдийг мэдээллээр хангах, соён гэгээрүүлэх зорилгоор төрийн болон төрийн өмчийн оролцоотой хуулийн этгээдийн уулзалтын танхим, хурлын заал, бусад танхимыг жилд нэг удаа үнэ төлбөргүй ашиглах, намын хөтөлбөр, үйл ажиллагааны талаарх нэвтрүүлгийг олон нийтийн радио, телевизээс гаргасан хуваарийн дагуу 30 минутаар улирал тутам үнэ төлбөргүй нэвтрүүлэхээр эрхтэйг хуульд заасан.

Дээрх зохицуулалтын хэрэгжилтийг хангах, шаардлага хангасан намуудад хуульд заасан шууд бус дэмжлэгийг үзүүлэх зорилгоор Сонгуулийн ерөнхий хорооны Улс төрийн намын мэдээлэл, арга зүйн газрын дарга Д.Баяндүүрэн Монголын үндэсний олон нийтийн радио, телевиз (МҮОНРТ), Нийслэлийн соёлын төв өргөө, Монголын хүүхдийн ордоны удирдлагуудтай энэ оны эхэнд уулзаж, хуулийн дээрх заалтыг хэрэгжүүлэх талаар тохиролцсон. Улмаар Монгол Улсын Их Хурлын 2024 оны ээлжит сонгуулиар нийт сонгогчийн нэг ба түүнээс дээш хувийн санал авсан есөн намын урьдчилсан хүсэлтээр уулзалт, хурал хийх болон телевиз, радиогийн нэвтрүүлэг түгээх хуваарь болон холбогдох бусад мэдээллийг МҮОНРТ, Нийслэлийн соёлын төв өргөө, Монголын хүүхдийн ордон болон шаардлага хангасан улс төрийн намуудад хүргүүлэн ажиллаж байна.

Хуульд заасан шаардлагыг хангасан улс төрийн нам нь намын удирдах дээд байгууллагыг хуралдуулах, гишүүд, дэмжигчидтэй хийх уулзалт, хурал зохион байгуулах, иргэдийг мэдээллээр хангах зорилго бүхий үйл ажиллагааг холбогдох хуваарийн дагуу зохион байгуулах боломжтой гэж Монгол Улсын Сонгуулийн ерөнхий хорооноос мэдээллээ.