“Монгол-Хятадын V экспо” БНХАУ-ын Өвөр Монголын Өөртөө Засах Орон (ӨМӨЗО)-ы Хөх хотноо 2025.08.25-ны өдөр нээлтээ хийнэ. Экспогийн салбар хуралдаанууд өнөөдрөөс эхэллээ. Тухайлбал, хоёр орны хамтын ажиллагааг өргөжүүлэх, бизнес эрхлэгчдийн гадаад харилцааг тэлэх, зах зээлийн шинэ боломжийг нээн, бэхжүүлэхэд чиглэсэн хуралдаанууд болж буйн нэг нь “Монгол Улс, БНХАУ-ын төр, үйлдвэрлэл, боловсрол, судалгааны байгууллагуудын хамтын ажиллагаа” сэдэвт хэлэлцүүлэг байлаа.    

Хуралдааныг нээж, Монгол Улсын Тэргүүн шадар сайд бөгөөд Эдийн засаг, хөгжлийн сайдын зөвлөх Д.Дашравдан, Хүнс, хөдөө аж ахуй, хөнгөн үйлдвэрийн яамны Мал аж ахуйн бодлогын хэрэгжилтийг зохицуулах газрын дарга Ц.Мөнхнасан, БНХАУ-ын талаас Худалдааны яамны Азийн газрын дарга Ван Липин, ӨМӨЗО-ы Худалдааны танхимын дарга Лө Чинь нар мэндчилгээ дэвшүүллээ. 

Хэлэлцүүлгийн үеэр Монгол-Хятадын төр, хувийн хэвшил, үйлдвэр, боловсрол, судалгаа шинжилгээ салбарын төлөөллүүд ногоон, дижитал эдийн засгийн хамтын ажиллагаа, худалдааны зөөлөн болон хатуу дэд бүтцийг сайжруулах зэрэг өргөн хүрээнд  хамтран ажиллах талаар харилцан санал солилцлоо. 

Монгол Улсын хувийн хэвшлүүдийг төлөөлж МҮХАҮТ-ын гүйцэтгэх захирал Ц.Магнайбаатар, “МАК” ХХК-ийн бодлогын зөвлөлийн дарга Б.Нямтайшир тэргүүтэй төлөөлөгчид үг хэлж, илтгэл хэлэлцүүллээ.