Монгол Улс, Бүгд найрамдах Энэтхэг улсын батлан хамгаалах салбарын харилцаа, хамтын ажиллагааны хүрээнд “Нүүдэлчин заан” хамтарсан сургалт, дадлага энэ сарын 31-нээс зургаадугаар сарын 13-ныг хүртэл Улаанбаатар хотноо зохион байгуулагдах гэж байна.

Энэтхэгийн армийн мэдэгдэлд дурдсанаар энэхүү сургуулилт нь НҮБ-ын олгосон мандатын дагуу болж буй бөгөөд уулархаг бүсийн хот тосгодод уламжлалт бус цэргийн ажиллагаа явуулах туршилт үйлдэх юм. Энэхүү сургуулиар хоёр орны цэргийн алба хаагчдын мэдлэг, ур чадварыг нэмэхийн зэрэгцээ, энхийг эрхэмлэсэн найрсаг хамтын ажиллагааг бататгаж буйгаараа онцлог.

Хоёр орны армийн хамтарсан “Нүүдэлчин заан” цэргийн хамтарсан сургалт, дадлага энэ жил 17 дахь жилдээ болж байна. Ташрамд дурдахад Монгол Улс, БНЭУ-ын хооронд 1955 оны 12 дугаар сарын 24-ний өдөр дипломат харилцаа тогтоосон юм. Энэ жил хоёр улсын хооронд дипломат харилцаа тогтоосны 70 жилийн тэгш ой тохиож байна.