Лаос Улсын нийслэл Вьентьян хотноо зохион байгуулагдаж буй Худалдаа, эдийн засаг, шинжлэх ухаан, техникийн хамтын ажиллагааны Монгол, Лаосын Засгийн газар хоорондын комиссын 12 дугаар хуралдааны хүрээнд Зам, тээврийн сайд Б.Дэлгэрсайхан Бүгд Найрамдах Ардчилсан Лаос Ард Улсын Гадаад хэргийн сайд Тонгсаван Фомвихантай уулзлаа.

Уулзалтын эхэнд сайд Б.Дэлгэрсайхан хоёр улсын харилцаа, хамтын ажиллагаа “Бие биеэ дэмжин харилцан ашигтай байх хамтын ажиллагааны зарчим”-д тулгуурлан бүхий л салбарт гүнзгийрэн хөгжиж, улс төрийн итгэлцэл бэхжиж, дээд, өндөр түвшний харилцан айлчлал, яриа хэлэлцээ тогтмолжиж байгааг онцлон тэмдэглэв.

Түүнчлэн Монгол Улсын Ази, Номхон далайн бүс нутагт чиглэсэн гадаад бодлогод Зүүн өмнөд Азийн улс орнуудтай, түүний дотор Лаос Улстай хөгжүүлж буй харилцаа, хамтын ажиллагаа чухал байр суурь эзэлдгийг дурдаад, хоёр улсын худалдаа, эдийн засгийн харилцан ашигтай хамтын ажиллагааг өргөжүүлэн хөгжүүлэхийн төлөө байгаагаа илэрхийлэв.

Хариуд нь Лаос Улсын Гадаад хэргийн сайд Тонгсаван Фомвихан Монгол Улсын Ерөнхийлөгч У.Хүрэлсүхийн 2023 онд Лаос Улсад, Лаос Улсын Ерөнхийлөгч Тонглун Сисүлит-ийн 2024 онд Монгол Улсад харилцан хэрэгжүүлсэн төрийн айлчлал нь хоёр орны уламжлалт найрсаг харилцааны ирэх шинэ жарны эхлэлийг тавьж, хамтын ажиллагааны агуулга, чиглэлийг тодорхойлох, улам бүр бэхжүүлэхэд чухал түлхэц болсныг онцлов.

Мөн Монгол Улсын АСЕАН-ы яриа хэлэлцээний түнш, Зүүн Азийн дээд түвшний уулзалтад оролцогч улс болох, Ази, Номхон далайн эдийн засгийн хамтын ажиллагааны байгууллага (АПЕК)-д элсэх зэрэг монголын талын эрмэлзлийг үргэлжлүүлэн дэмжиж ажиллахаар болов.

Түүнчлэн энэ онд Улаанбаатар хотноо зохион байгуулагдах Зүүн Ази, Латин Америкийн хамтын ажиллагааны чуулга уулзалт /ФЕАЛАК/-ын Гадаад хэргийн сайд нарын X уулзалтад оролцохоо илэрхийлэв.

Талууд хоёр улс НҮБ болон олон улсын бусад байгууллагын хүрээнд идэвхтэй хамтран ажиллаж ирснийг тэмдэглээд, цаашид ч уламжлалт байр сууриа хадгалж, хамтын ажиллагаагаа гүнзгийрүүлэн бэхжүүлэхийн төлөө буйгаа нотлов.