2025 он гарснаар Зам тээврийн салбарт шинээр хэрэгжиж эхэлсэн хуулиудыг танилцуулж байна.

Тухайлбал, 2025 оны нэгдүгээр сарын 1-нээс Төмөр замын тээврийн тухай хууль болон Иргэний нисэхийн тухай хуулийн нэмэлт өөрчлөлтүүд хэрэгжиж эхэлсэн.

Төмөр замын тээврийн тухай хуулийн шинэчилсэн найруулгын төсөл УИХ-аар 2022 онд батлагдаж, энэхүү хууль нь 16 жилийн дараа шинэчлэгдэн батлагдсан билээ.

Төмөр замын тээврийн тухай хууль /шинэчилсэн найруулга/-ийн 10 дугаар зүйлийн 10.1-д “Төмөр замын тээврийн асуудал хариуцсан төрийн захиргааны байгууллага нь төмөр замын тээврийн үйл ажиллагаатай холбоотой хяналт, зохицуулалтыг хэрэгжүүлэх чиг үүрэг бүхий Засгийн газрын хэрэгжүүлэгч агентлаг байна.” гэж заасан.

Уг агентлаг нь төмөр замын тээвэрлэлтийн үйл ажиллагаанд суурь бүтэц эзэмшигчийн хооронд, суурь бүтэц эзэмшигч болон тээвэрлэгчийн хооронд үүсэх харилцааг зохицуулах, галт тэрэгний хөдөлгөөнийг захирамжлан зохион байгуулах чиг үүрэгтэй төрийн захиргааны байгууллага юм.

Гэвч Монгол Улсын 2024 оны төсвийн тухай хуульд Монгол Улсын төсөвт 2024 оны төвлөрүүлэх орлого, зарлагын бүрэлдэхүүнд Засгийн газрын хэрэгжүүлэгч агентлаг “Төмөр замын газар” байгуулах асуудал тусгагдаагүй болно.

Иймд дээрх агентлаг нь 2024 онд байгуулагдахгүй болсон тул Төмөр замын тээврийн тухай хуулийн хүчин төгөлдөр болох хугацааг “2024 оны 01 дүгээр сарын 01-ний” гэснийг “2025 оны 01 дүгээр сарын 01-ний” гэж , Төмөр замын тээврийн тухай хууль /шинэчилсэн найруулга/-ийг дагаж мөрдөх журмын тухай хуулийн 1 дүгээр зүйлийн "2023 оны 12 дугаар сарын 31-ний" гэснийг "2024 оны 12 дугаар сарын 31-ний" гэж, 5 дугаар зүйлийн "2024 оны" гэснийг "2025 оны" гэж тус тус өөрчилсөн байна.

Харин Иргэний нисэхийн тухай хууль Хөгжлийн бодлого төлөвлөлөлт, түүний удирдлагын тухай хууль, Зөрчлийн тухай хууль, Захиргааны ерөнхий хуультай холбогдуулан 2001, 2003, 2008, 2011, 2015, 2017 онд тус тус нэмэлт өөрчлөлт орж байжээ. Мөн л Иргэний нисэхийн тухай хууль /Шинэчилсэн найруулга/-ийн 52 дугаар зүйлийн 52.1 дэх хэсгийн "2024 оны 01 дүгээр сарын 01-ний" гэснийг "2025 оны 01 дүгээр сарын 01-ний" гэж өөрчилжээ гэж Зам, тээврийн яамнаас мэдээллээ.