УИХ дахь АН-ын бүлгийн дарга О.Цогтгэрэл өнөөдөр мэдээлэл хийж бараг уучлал гуйв. МАН дотооддоо хагарсан, Ерөнхий сайд Н.Учралын хамаарал бүхий “Их засаг кинг” сургуульд төсвийн тодотголоор 3.5 тэрбум төгрөг олгохыг завдсан асуудал өндрөө аваад буй энэ үед олон нийт АН-ын амыг харж байна. Гэтэл АН-ын дарга О.Цогтгэрэл бараг л бид Засгийн газрыг огт оролдоогүй шүү, биднийг парламентын хуралдааныг бойкотлож байна гэсэн ташаа мэдээлэл тарж байна гэсэн утгатай бараг наминчлал хэлэв.

Тодруулбал, тэрбээр “МАН болон Засгийн газрын зүгээс АН-ыг УИХ-ын чуулганы хуралдааныг бойкотолж, гацааж байна гэдэг гүтгэсэн, мушгин гуйвуулсан мэдээлэл түгээж байна. МАН  дангаараа 64, эвсэж хамтарч байгаа намуудтайгаа 80 суудалтай улс төрийн хүчин шүү дээ. Тэд УИХ-ын чуулган болгон бүх байнгын хорооны ирцийг дангаараа бүрдүүлэх боломжтой” гэв. Мөн “АН Засгийн газрыг огцруулах гэж байна гэдэг зүйлийг зохион түгээж байна. МАН дотооддоо эв нэгдэлтэй байвал Засгийн газар огцрох асуудал яригдахгүй. Засгийн газраа огцруулах эрх тэдэнд л бий. Олонх ирцээ бүрдүүлсэн тохиолдолд цөөнх УИХ-ын үйл ажиллагаанд оролцоод явна. АН-ын зүгээс Ерөнхий сайдыг өөртөө итгэл үзүүлэх эсэх асуудлыг оруулж ир гэж шахаж байна гэдэг зүйлийг тавьж байна. Бид шинэ зүйл олж мэдчихээд шаардаад байгаа зүйл биш юм. Энэ нь парламентат ёсны үйл ажиллагааны нэг хэлбэр" гэлээ.