Монгол Улс, Оросын Холбооны Улсын бүс нутаг хоорондын шууд харилцааг бэхжүүлэх, худалдаа, эдийн засаг, аялал жуулчлал, бизнесийн түншлэлийг өргөжүүлэх зорилготой Монгол, Оросын бүс нутгийн II чуулга уулзалт 2026 оны есдүгээр сарын 14–15-ны өдрүүдэд Улаанбаатар хотноо зохион байгуулагдаж байна.

Чуулганд хоёр улсын төр, орон нутгийн байгууллага, бизнесийн салбарын 400 гаруй төлөөлөгч оролцож, салбар хуралдаан, бизнес хоорондын (B2B) уулзалт болон бүс нутгийн удирдлагуудын хоёр талт уулзалтууд зохион байгуулагдаж байгаа юм.

Хөвсгөл аймгийг төлөөлөн аймгийн Засаг даргын орлогч Ц.Гансүх оролцож, ОХУ-ын Эрхүү мужийн захирагч И.И.Кобзевтэй хоёр талт уулзалт хийлээ.

Уулзалтаар Хөвсгөл аймаг, Эрхүү муж хоорондын худалдаа, эдийн засаг, аялал жуулчлал болон бусад салбарын харилцааг хөгжүүлэх, хамтарсан төсөл, арга хэмжээ хэрэгжүүлэх боломжийн талаар санал солилцож, хоёр талын хамтын ажиллагааг өргөжүүлэх хэлэлцээрт гарын үсэг зурлаа.