Нотлох баримтгүй үйлдэл
 

Энэ асуудал анх УИХ-ын Өргөдлийн байнгын хорооны хурал дээр Х.Баасанжаргал гишүүн хөндөж, О.Номинчимэг лавшруулсан нь олны анхааралд өртсөн. Удалгүй Боловсролын яамны Төрийн нарийн бичгийн дарга Г.Ням-Очир “Их засаг кингс” тэргүүтэй сургуулиуд төсвөөс санхүүжилт авах хүсэлт ирүүлсэн” гэдгийг баталсан. Г.Ням-Очир даргын байр суурь удалгүй хувирч, “Боловсролын яам хөтөлбөр хэрэгжүүлэх саналыг “Их засаг кингс” сургуульд тавьсан ч бил үү” гэдэг эргэлзээтэй зүйл ярьсан.

Тэгвэл Ерөнхий сайд Н.Учрал “Манай гэр бүлийн сургууль мөнгө төгрөг авах хүсэлт гаргаагүй. Нотлох баримтгүй. Боловсролын яам тэр асуудлаа нотлох баримттай ярих хэрэгтэй” гэдэг тайлбар өгөв. Түүнийг хэлмэгдэгсдийн хөшөөний дэргэд ийм тайлбар хийхтэй зэрэгцэн, Сангийн сайд З.Мэндсайхан “Төсвөө өргөн барьсан сайд нь би. Энэ 50 тэрбум төгрөг зарцуулаагүй. Гэрт ойрхон сургууль-хамгийн сайн сургууль хөтөлбөрийг хэрэгжүүлэхээр төсөвт оруулж ирсэн. Би хэрхэн зарцуулахыг нь мэдэхгүй. Боловсролын яамны Төрийн нарийн бичгийн дарга ямар зорилгоор тийм зүйл ярьсан мэдэхгүй. Миний өргөн барьсан төсөв тодор аль нэг сургуульд мөнгө өгнө гэсэн зүйл байхгүй. Нотлох баримтгүй” гэдэг тайлбар хийв.

Ямартай ч Ерөнхий сайд Н.Учралын ээж Ж.Цэцэгмаагийн байгуулсан “Их засаг кингс” сургууль төсвийн тодотголоор 3.5 тэрбум төгрөг хүртэх гэж байсан асуудалд албаныхан ийм тайлбар өгөөд байна. Эцэстээ Ерөнхий сайдын хамаарал бүхий “Их засаг кингс” сургууль батлагдаагүй төсвөөс зарцуулаагүй 50 тэрбумаас нотлох баримтгүйгээр 3.5 тэрбум төгрөг авах гэж байсан нь нотлох баримтгүй гэдэг тайлбар л үлдлээ.