Ерөнхий сайд Н.Учралын “хэмнэлт” гэдэг үг огт хэрэгжихгүй гэдгийг Хот байгуулалт, барилга, орон сууцжуулалтын сайд Э.Бат-Амгалан батлав.
Засгийн газраас өнгөрсөн сард 2026 оныг дуустал төсвийн хэмнэлт хийх 325 дугаар тогтоолыг баталсан. Тогтоолын гол агуулга нь төр шаардлагагүй зардлаа танаж, хэмнэхийг бүх шатны төсвийн захирагч нарт даалгасан юм. Энэ нь улсын төсөв улайж, 2 гаруй их наяд төгрөгөөр тасарсантай холбоотой шийдвэр. Тус тогтоолын 2.3-т “... нийтээр тэмдэглэх баяр ёслол, салбарын өдөр, нэрэмжит болон тэмдэглэлт ой, урлаг спортын уралдаан, наадам, тэмцээн зохион байгуулахгүй байх” гэжээ. Ингэж хэмнэхийн эцсийн зорилго нь төсвийн байгууллагууд байгаа мөнгөөрөө цалин, тэтгэврээ тасралгүй тавих гэсэн арга.
Гэвч 325 дугаар тогтоол татвар төлөгчдийн мөнгийг үр ашигтай зарцуулах гэсэн оролдлого төдий гэдгийг Засгийн газрын гишүүн өөрөө бодитоор үлгэрлэв. Э.Бат-Амгалан сайд өнгөрсөн амралтын өдрүүдэд барилгын салбарын 100 жил нэрээр Монгол орон даяар нижгэр наргилаа. Толгойдоо хааны малгай өмсөн, бөхийн өргөөний хойморт заларч, олон зуун сая төгрөгийн шагналтай бөх барилдуулж наадсаныг телевизийн өндөр төлбөртэй шууд дамжуулалтууд харууллаа. Олон зуун саяар тансаг буудлаас эхлээд томоохон танхимууд түрээслэж, баярын хурлуудыг угсруулав. Сонирхолтой нь, яамны албан хаагчид сайдын энэхүү үрэлгэн зардлыг Засгийн газрын тогтоол зөрчсөн гэдгийг анхааруулсаар байсан ч хүчээр баяр тэмдэглэсэн гэх.
Яам, тамгын газрууд ой тэмдэглэх нэрээр тэрбум, тэрбум төгрөг урсгадгийн хамгийн наад захын жишээ энэ удаагийнх бөгөөд 325 дугаар тогтоол Хот байгуулалт, барилга, орон сууцжуулалтын яамны удирдлагуудад үйлчилсэнгүй. Хамгийн гол нь Ерөнхий сайд манлайлан хэмнэлтийн горим тогтоосныг Барилгын яам шууд үгүйсгэсэн үйлдэл нь салбарын сайдын толгой Засгийн газрын хуралдаанаас гаргасан тогтоолоос томыг илтгэв.