Монгол Улсын Шадар сайд Н.Номтойбаяр өнөөдөр Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масарүг хүлээн авч уулзлаа.
Уулзалтын эхэнд Шадар сайд Япон Улстай харилцаа, хамтын ажиллагааг бүхий л салбарт өргөжүүлэн хөгжүүлж, найрсаг харилцаа, харилцан итгэлцлийг бэхжүүлэх нь Монгол Улсын гадаад бодлогын тэргүүлэх чиглэлийн нэг гэдгийг онцлов. Мөн Монгол Улсын нийгэм, эдийн засгийн тогтвортой хөгжлийг дэмжихэд Япон Улс тууштай дэмжлэг үзүүлж ирсэнд талархал илэрхийлжээ.
Уулзалтаар гамшгаас хамгаалах технологи, инновац нэвтрүүлэх, шатахууны нөөцийн агуулах шинээр барих, гамшгийн эрсдэлийг бууруулах чадавхыг нэмэгдүүлэх чиглэлээр Япон Улсын туршлага, дэвшилтэт технологийг ашиглах боломжийн талаар санал солилцов.
Элчин сайд Игавахара Масарү хоёр улсын харилцаа, хамтын ажиллагааг харилцан ашигтай, урт хугацааны тогтвортой түншлэлийн зарчимд тулгуурлан өргөжүүлж, тодорхой төсөл, хөтөлбөр хэрэгжүүлэхэд хамтран ажиллахаа илэрхийллээ.
Шадар сайд Н.Номтойбаяр Евразийн эдийн засаг, тээвэр, логистикийн уялдаа холбоонд Монгол Улсын оролцоог нэмэгдүүлэхийн зэрэгцээ Япон Улстай харилцан итгэлцэлд суурилсан хамтын ажиллагааг бүхий л салбарт бэхжүүлэхэд анхаарч ажиллахаа онцлов.
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.