Дорноговь аймгийн Алтанширээт суманд баригдаж буй Газрын тос боловсруулах үйлдвэрийн бүтээн байгуулалт төлөвлөгөөний дагуу эрчимтэй үргэлжилж байна.

Олон улсын геополитикийн нөхцөл байдал хүндрэлтэй хэвээр байгаа энэ үед үйлдвэрийн техник, тоног төхөөрөмж болон технологийн багц байгууламжуудыг үе шаттайгаар нийлүүлж, угсралтын ажлыг үргэлжлүүлж буйг албаныхан мэдээллээ.

Хоёр сарын өмнө Атмосферийн нэрлэгийн цамхгийг (CDU) үйлдвэрийн талбайд хүлээн авсан бол энэ удаад Энэтхэгт үйлдвэрлэсэн Вакуум нэрлэгийн цамхагийг (VDU) Дорноговь аймаг дахь үйлдвэрийн талбайд амжилттай хүргэн авчирчээ. Тус төхөөрөмжийг Энэтхэгийн Мумбай боомтоос далайгаар тээвэрлэн БНХАУ-ын Тяньжин боомтод буулгаж, улмаар хүнд даацын автомашинаар Монголд тээвэрлэсэн байна.

Газрын тос боловсруулах үйлдвэр нь дотоодын газрын тосны бүтээгдэхүүний хэрэгцээг хангах, импортын хамаарлыг бууруулах стратегийн ач холбогдолтой төсөл бөгөөд бүтээн байгуулалтыг эрчимжүүлэх чиглэлээр Улсын Их Хурал, Засгийн газраас шаардлагатай шийдвэрүүдийг шуурхай гарган ажиллаж байгаа юм.

Мөн дотоодын газрын тосны олборлолтыг нэмэгдүүлэх хүрээнд Петрочайна компанитай үүсээд байсан 30 жилийн маргааныг шийдвэрлэх эрх зүйн орчныг бүрдүүлж, олборлолтын хүчин чадлыг нэмэгдүүлэх боломжийг бий болгож байгааг онцоллоо.