Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.06.18) ОХУ-ын Бүгд Найрамдах Тува Улсын Тэргүүн Владислав Товарищтайович Ховалыгийг төрийн ордонд хүлээн авч уулзлаа.

Талууд Монгол, Тувагийн тээвэр, логистикийн хамтын ажиллагааг өргөжүүлэх, баруун бүсийн тээврийн шинэ гарц, холболтуудыг хөгжүүлэх, автозам, төмөр зам, агаарын тээврийн салбарт илүү өргөн хүрээтэй хамтран ажиллах тухай дэлгэрэнгүй санал солилцлоо.

Уулзалтын эхэнд Зам, тээврийн сайд Б.Дэлгэрсайхан Монгол Улс хоёр хөрштэйгээ тээврийн харилцааг хөгжүүлэх, тэр дундаа хил дамнасан гарц, боомтуудын хүчин чадлыг нэмэгдүүлэх, бүс нутгийн хамтын ажиллагааг эрчимжүүлэх, тээврийн салбарт автозам, төмөр зам, агаарын тээврийн чиглэлд илүү түлхүү хамтран ажиллах бодлого баримтлан ажиллаж байгааг дурьдлаа.

Мөн хил залгаа бүс нутгуудын хамтын ажиллагааг эрчимжүүлэх нь хоёр улсын худалдаа, эдийн засаг, аялал жуулчлал, ард иргэдийн амьдралд чухал ач холбогдолтойг онцлон тэмдэглэлээ.

Сайдын зүгээс Монгол Улсын Засгийн газрын 2024-2028 оны үйл ажиллагааны хөтөлбөрт тусгагдсан Арцсуурь, Овоот, Шивээхүрэн, Сэхээ чиглэлийн баруун босоо төмөр замын төслийн талаар танилцууллаа. Уг төслийг Орос, Монгол, Хятадын эдийн засгийн коридорын хүрээнд хэрэгжих Кызыл-Курагино чиглэлийн төмөр замын төслүүдтэй стратегийн хувьд уялдуулан хөгжүүлэх боломжтой бөгөөд ингэснээр хил дамнасан ачаа тээврийн шинэ гарц бий болж, бүс нутгийн тээврийн урсгал эрс нэмэгдэх боломжтой гэж үзэж байгаагаа илэрхийллээ.

Мөн талууд Монгол, Тува Улсыг холбодог Боршоо-Хандгайт болон Арцсуурь-Цагаантолгой боомтуудын дэд бүтцийн хөгжил, авто замын сүлжээний уялдаа холбоог сайжруулах чиглэлээр санал солилцлоо. Арцсуурь боомтыг хатуу хучилттай авто замаар холбох төслийн хэрэгжилт нь хил орчмын худалдаа, эдийн засгийн хамтын ажиллагааг өргөжүүлэхэд чухал ач холбогдолтойг онцоллоо.

Уулзалтаар талууд мөн агаарын тээврийн хамтын ажиллагааны асуудлыг хэлэлцэж, Кызыл-Улаанбаатар чиглэлийн тогтмол нислэг 2026 оны зургаадугаар сарын 5-наас эхэлсэн бөгөөд энэхүү хамтын ажиллагаа нь иргэдийн зорчих хөдөлгөөн, аялал жуулчлал, бизнесийн харилцааг идэвхжүүлэхэд бодит түлхэц болно гэдэгт итгэлтэй байгаагаа илэрхийллээ.

Түүнчлэн хоёр улсын тээврийн салбарын хамтын ажиллагааг шинэ шатанд гаргах, тээврийн салбарт хэрэгжүүлэх дэд бүтцийн томоохон төслүүдийн уялдаа холбоог хангах, хил орчмын хамтын ажиллагааг өргөжүүлэх, тээвэр логистикийн шинэ боломжуудыг хамтран судалж, хамтран ажиллах тухай харилцан санал солилцлоо.

Уулзалтын төгсгөлд талууд Монгол Улс нь ОХУ болон БНХАУ-ыг холбосон стратегийн байрлалтай бөгөөд Тува Улстай хөгжүүлэх тээврийн хамтын ажиллагаа нь бүс нутгийн худалдаа, эдийн засгийн харилцааг идэвхжүүлэхэд чухал ач холбогдолтойг талууд онцоллоо. Мөн хоёр улсын хамтын ажиллагааны хүрээнд харилцан ашигтай төсөл, хөтөлбөрүүдийг үргэлжлүүлэн судалж, бодит ажил хэрэг болгохын төлөө хамтран ажиллахад санал нэгдлээ.