Улсын Их Хурлын гишүүн, Монгол-Азербайжаны парламентын бүлгийн дарга С.Замира тэргүүтэй тус бүлгийн гишүүд өнөөдөр Бүгд Найрамдах Азербайжан Улсын парламентын бүлгийн дарга, гишүүдтэй цахим уулзалт хийлээ.

Уулзалтын эхэнд Монгол-Азербайжаны парламентын бүлгийн дарга С.Замира, Бүгд Найрамдах Азербайжан Улсын парламентын гишүүн, Азербайжан-Монголын парламентын бүлгийн дарга, гишүүдтэй уулзсандаа баяртай байгаагаа илэрхийлээд, Монгол Улсын Парламентын бүлгэмийн Гүйцэтгэх хорооны даргын 2025 оны 04 дүгээр сарын 22-ны өдрийн захирамжаар Монгол-Азербайжаны парламентын бүлгийг байгуулж, даргаар нь томилогдон ажиллаж буйгаа танилцууллаа. Тус бүлэгт нийт зургаан гишүүн ажиллаж буйг дуулгаад, парламентын бүлгүүд анх удаа албан ёсоор цахим уулзалт хийн хамтын ажиллагааны эхлэлийг тавьж буй нь хоёр улсын найрсаг харилцааг шинэ шатанд гаргах чухал алхам болно гэж үзэж байгаагаа тэмдэглэв.

Тэрбээр, Манай хоёр улс газар зүйн хувьд алслагдмал боловч түүх, уламжлал, нүүдлийн соёл иргэншлийн өв, тусгаар тогтнол, үндэсний үнэт зүйлсээ эрхэмлэн дээдэлдэг нийтлэг шинжээрээ ойр дотно хэмээгээд, энэхүү нийтлэг үнэт зүйлдээ тулгуурлан цаашид парламент хоорондын хамтын ажиллагааг өргөжүүлэн хөгжүүлэх бүрэн боломжтой гэв.

БНАУ-ын парламент дахь Азербайжан-Монголын бүлгийн дарга Захид Оружд, хоёр улсын парламент хоорондын харилцааг өргөжүүлэхэд гүүр болон ажиллахад бэлэн байгаагаа илэрхийлээд, 1991 онд тусгаар тогтнолоо зарлахад хүлээн зөвшөөрсөн анхны улс орнуудын нэг нь Монгол гэдгийг онцлов. Тэрбээр Монгол Улсын Ерөнхийлөгч 2018 онд тус улсад айлчилснаас гадна 2024 онд нийслэл Баку хотноо зохион байгуулсан НҮБ-ын Уур амьсгалын өөрчлөлтийн суурь конвенцын талуудын 29 дүгээр бага хуралд оролцох үеэрээ Ерөнхийлөгч Илхам Алиевтэй уулзаж байсныг дурдав. Мөн хоёр орны хамрилцаа, хамтын ажиллагааг хөгжүүлэх өргөн боломж бий тодотгосон юм.

Уулзалтын үеэр хоёр улсын парламентын бүлгүүдийн харилцаа, хамтын ажиллагааг улам гүнзгийрүүлж, цаашид хөрөнгө оруулалт, худалдаа, аялал жуулчлал, соёл, урлаг, боловсрол, хөдөө аж ахуй, газар тариалан зэрэг олон салбарт төр, хувийн хэвшлийн түншлэлийг холбох гүүр болж ажиллах талаар санал солилцов. Түүнчлэн парламент хоорондын хамтын ажиллагааг идэвхжүүлэхийн зэрэгцээ дипломат харилцааг улам өргөжүүлэн хөгжүүлэх, төлөөлөгчийн газрын хамтын ажиллагааг эрчимжүүлэх, төрийн өндөр дээд түвшний харилцан айлчлалуудыг зохион байгуулах чиглэлээр бодитой хамтран ажиллах талаар ярилцлаа.

Уулзалтад Монгол-Азербайжаны парламентын бүлгийн гишүүн М.Бадамсүрэн, С.Зулпхар, Х.Жангабыл, Азербайжан-Монголын парламентын бүлгийн гишүүн Азер Бабамов, Рази Нуруллаев нар оролцлоо хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.