Монгол Улсын Их Хурлын даргын 2026 оны 29 дүгээр  захирамжаар байгуулагдсан Татварын эрх зүйн орчныг боловсронгуй болгох санал, дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсэг 2026 оны 03 сарын 23-нд  “Их эзэн Чингис хаан” танхимд хуралдлаа.


Хуралдааны эхэнд Улсын Их Хурлын гишүүн, ажлын хэсгийн ахлагч Л.Соронзонболд гишүүдийн ирц, хэлэлцэх асуудлын талаар танилцуулав. Хуралдаанд Улсын Их Хурлын гишүүн А.Аринзаяа, Р.Батболд, П.Ганзориг, Н.Наранбаатар, У.Отгонбаяр, Д.Пүрэвдаваа, Л.Соронзонболд, Г.Тэмүүлэн, С.Эрдэнэбат танхимаар, Улсын Их Хурлын гишүүн М.Энхцэцэг, С.Цэнгүүн нар цахимаар оролцов.


Ажлын хэсгийн гурав дахь удаагийн хуралдаанаар Татварын ерөнхий хуульд нэмэлт, өөрчлөлт оруулах тухай хуулийн төсөл болон дагалдан боловсруулсан хуулийн төслүүд, Аж ахуйн нэгжийн орлогын албан татварын тухай, Хувь хүний орлогын албан татварын тухай, Нэмэгдсэн өртгийн албан татварын тухай хуулийн нэмэлт, өөрчлөлтийн төслүүдийг зүйл, заалт бүрээр хэлэлцлээ.  


Хуралдаанд Сангийн яам, Татварын ерөнхий газар, Гаалийн ерөнхий газрын холбогдох албан тушаалтнууд оролцож, татварын багц хуулийн төлсүүдтэй холбоотой гишүүдийн асуултад хариулж, санал солилцов хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.