АНУ-ын Өмнөд Каролинагийн их сургуулийн эрдэмтэд дэлхийн дотоод цөм уян хатан болохыг санамсаргүйгээр олж мэдсэн тухайгаа мэдэгдлээ. Тус сургуулийн Дэлхий судлалын профессор Жон Видэйлээр удирдуулсан судлаачид дэлхийн дотоод цөмийн эргэлтийн хурдыг судлах явцдаа дээрх нээлтийг хийсэн байна. Судлаачдын баг 1991-2024 онд тохиосон 121 удаагийн газар хөдлөлтийн мэдээлэл дээр үндэслэн дотоод цөмийн шинж чанарыг тодорхойлох гайхмаар хэд,хэдэн мэдээлэл олж харжээ. Газар хөдлөлтийн долгионы хурд болон хэлбэрээр дэлхийн дотоод цөм хатуу бус уян хатан болохыг тогтоосон байна.

“Олон арван жилийн газар хөдлөлтийн дата мэдээлэлд анализ хийхэд долгионы хэлбэрүүд гайхмаар ялгарч байсан. Энэ бол дэлхийн цөм бат бөх бус уян хатан шинж чанартай болохын илэрхийлэл” эрдэмтэн Жон Видэйл ярьсан юм.

Олон зуун жилийн турш дэлхийн дотоод цөм маш хатуу гэх ойлголттой байсан. Сургуульд ч ингэж заадаг байсан бол дээрх эрдэмтдийн судалгаа дэлхийн дотоод цөмтэй холбоотой ойлголтыг үндсээр нь эргүүллээ. Түүнчлэн дэлхийн дотоод цөм нь бүтцийн өөрчлөлтөд орж байж болзошгүй гэж эрдэмтэд дүгнэж байна. Цаашид энэхүү ажиглалтыг илүү нарийвчилж хийх ёстойг эрдэмтэд анхаарууллаа. Дэлхийн дотоод цөмтэй холбоотой эрмэд шинжилгээний өгүүлэл энэ сарын 10-ны өдөр “Nature Geoscience” сэтгүүлд нийтлэгджээ.