Дэлхийн олон улс цаг уурын дулааралтай тэмцэхийн тулд олон тэрбум мод тарих амлалт өгдөг. Энэ ч утгаараа манай гарагийн өнцөг булан бүрд мод тарих хөдөлгөөн идэвхтэй өрнөдөг гэж болно. Гэхдээ шинээр тарьж ургуулахаас илүүтэйгээр байгалийн ой, хөвчийг нөхөн сэргээх, доройтлыг нь зогсоовол асар их хүчин чармайлтын тэн хагасыг хэмнэх боломжтойг эрдэмтдийн явуулсан сүүлийн үеийн судалгааны үр дүн харуулж байна. АНУ-ын Орегоны их сургуулийн эрдэмтэн, судлаачдын хийсан судалгаагаар зарим бүс буюу огт мод ургадаггүй газарт мод суулгаснаар тодорхой хэмжээний ач холбогдол үзүүлж болох ч доройтолд орсон ойг нөхөн сэргээх нь илүү үр дүнтэй гэж зөвлөж байна. Үүний зэрэгцээ мод тарих ажлыг өрнүүлэх нь нөхөн сэргээх аргатай төгс зохицох аж. “Nature Climate Change” сэтгүүлд гарсан судалгааны тайланд 138 улсад нэг төрлийн модыг шинээр тарьж ургуулсан сүүлийн гучин жилийн үр дүн хийгээд ойг нөхөн сэргээхэд зарцуулсан төсөв мөнгөний зардлыг гаргаж, харьцуулан тооцоолсон дүнг танилцуулжээ. Ингээд үзэхэд судалгаанд хамрагдсан бүс нутгуудын 46%-д ой нахан сэргээх нь илүү хялбар, зардал багатай, хүч хөдөлмөр бага шаардах нь тодорхой болсон байна.