1995 онд үйлдсэн хүн амины хэргийн улмаас цаазаар авах ял сонссон Криста Пайкийг цаазлах гэсэн оролдлого бүтэлгүйтсэний дараа амьд үлдэж, энэ долоо хоногт эмнэлэгт төөрөгдөлд орсон байдалтай сэрсэн талаар түүний өмгөөлөгчид лхагва гарагт мэдээлжээ. Долоо хоногийн өмнө Ривербенд дэх чанга дэглэмтэй хорих ангид хүчтэй үйлчилгээтэй барбитурат төрлийн "пентобарбитал" эмийг хоёр удаа тарьсан ч амийг нь хөнөөж чадаагүй тул 50 настай Пайкийг цаазаар авах өрөөнөөс Нэшвилл дэх эмнэлэг рүү ухаангүй, биеийн байдал нь маш хүнд байдалтайгаар хүргэсэн байна. Шүүгч Теннесси мужийн албан тушаалтнуудад бүтэлгүйтсэн цаазаар авах ялын үед ашигласан тариур болон бусад нотлох баримтыг хадгалахыг тушаажээ. 

Пайкаас гадна Тони Каррутерс гэх хүний нарт цаазаар авах ял гүйцэтгэх оролдлого бүтэлгүйтсэнтэй холбоотойгоор мөрдөн шалгах ажиллагаа үргэлжилж байгаа тул Амбан захирагч Билл Ли энэ онд үлдсэн хугацаанд цаазаар авах ял гүйцэтгэх бүх ажиллагааг түр зогсоолоо. Пайк маш хүнд байдалтай, эмнэлгийн орондоо гавлуулсан хэвээр байгаа бөгөөд эдгэрэхэд урт хугацаа шаардагдахаар байна гэж түүний өмгөөлөгчид мэдэгджээ.

Тэрбээр хоол идэж, залгиж чадахгүй, уушгины хатгалгаатай, мөн "маш их хавдсан" гар, сарвуугаа хөдөлгөж чадахгүй байгаа аж. Пайк 1995 онд нэг ангийн сурагч, 19 настай Коллин Слеммерийг тамлан хөнөөсөн хэргээр цаазын ял сонссон юм. Пайкийн хүссэнээр зөвхөн эмэгтэйчүүдээс бүрдсэн цаазаар авах ялын баг хоёр цагаас илүү үргэлжилсэн  ажиллагааны үеэр дор хаяж долоон зүү ашигласан бөгөөд нэг зүүг сугалахад 90 градус нугарсан гэж түүний өмгөөлөгчид мэдэгдсэн байна. Теннесси мужийн Засан хүмүүжүүлэх газраас цаазаар авах эмийн үлдэгдэл ул мөрийг химийн шинжилгээнд авахыг хүссэн Пайкийн өмгөөлөгчдийн хүсэлтийг хараахан шийдвэрлээгүй байна.