Оросын эрх баригчид Сибирь дэх тахал судлалын хүрээлэнгийн ажилтан "тодорхойгүй" шалтгаант уушгины үрэвслийн улмаас нас барсны улмаас тус ажилтантай хавьталд орсон хүмүүст хяналт тавьж байгаа тухай мэдээлэл цацагдаад байгаа билээ.  

Оросын албаныхан түүний нас барсан шалтгааныг ажиллаж байсан лабораторын эмгэг төрүүлэгч бичил биетнүүдийн аль нэгээс үүдэлтэй болохыг нотлох баримт олдоогүй гэж мэдэгдээд байгаа билээ.  Гэвч хэвлэл мэдээллийн хэрэгслээр түүнийг хүнээс хүнд халдварлах боломжтой, ховор тохиолддог ч маш хүнд хэлбэр болох уушгины тахлаар нас барсан байж болзошгүй тухай батлагдаагүй мэдээлэл цацагдсаж, тус улсад түгшүүр үүсээд байна.

Тус эмэгтэй нь Зүүн өмнөд Сибирийн Эрхүү хотод байрлах Сибирь, Алс Дорнодын Тахал эсэргүүцэх судалгааны хүрээлэнд ажилладаг.  Оросын хүн амын эрүүл мэндийг хянах байгууллага болох "Роспотребнадзор"-ын тэргүүн Анна Попова өнгөрсөн баасан гарагт Иркутск хотод хүрэлцэн ирж, тус мужийн захирагч Игорь Кобзев болон бусад албаны хүмүүстэй уулзсан байна. Кобзев тухайн эмэгтэйтэй хавьталд орсон бүх хүнийг эмнэлгийн хяналтад авсан талаар мэдэгджээ. Тэрбээр халдварын төрлийг тодорхой нэрлээгүй бөгөөд үүнийг "онц аюултай халдвар"-ын сэжигтэй тохиолдол гэжээ.

Мөн "Роспотребнадзор" байгууллагаас халдварт өвчин тархахаас сэргийлэх цогц арга хэмжээг авч хэрэгжүүлж байгаа аж. Ням гарагт "Роспотребнадзор"-оос тухайн эмэгтэйд "шалтгаан нь тодорхойгүй уушгины үрэвсэл" (pneumonia of unknown etiology) гэсэн онош тавьсан бөгөөд  шинжилгээгээр өвчтөний ажил мэргэжилтэй холбоотой ямар нэгэн бичил биетэн илрээгүй гэж мэдэгдсэн байна.

Тус агентлагийн мэдээлснээр, уг эмэгтэйтэй хавьталд орсон хүмүүсээс хоёрынх нь шинжилгээгээр энгийн ханиад үүсгэдэг вирус, харин нөгөө хоёрынх нь шинжилгээгээр COVID-19 илэрсэн бол бусад шинжилгээнд хамрагдсан хүмүүсийн хариу сөрөг гарчээ. АНУ-ын Төрийн нарийн бичгийн дарга Марко Рубио даваа гарагт мэдэгдэл хийхдээ, одоогоор түгшүүр зарлах шалтгаан байхгүй гэж үзэж байгаа ч тусгаарлалт болон нийгмийн эрүүл мэндийн бусад арга хэмжээг үл харгалзан уг өвчин "хурдан тархах эрсдэлтэй" учир  нөхцөл байдлыг анхааралтай ажиглаж байна гэжээ.

Орон нутгийн "Люди Байкала" (Lyudi Baikala) бие даасан мэдээллийн хэрэгсэл нэрээ нууцалсан эх сурвалжуудаас иш татан мэдээлснээр, 28 настай лабораторийн ажилтан уушгины тахлын улмаас нас барж, Эрхүү хотын хэд хэдэн эмнэлгийг хөл хорионд оруулсан байна. Даваа гарагт уг асуудлаар тайлбар өгөхийг хүсэхэд Кремлийн хэвлэлийн төлөөлөгч Дмитрий Песков олон нийт болон хэвлэл мэдээллийнхэн "цуу яриа, таамаглал"-д бус, харин "Роспотребнадзор"-ын (Оросын хэрэглэгчийн эрхийг хамгаалах болон хүний ​​сайн сайхан байдлыг хянах алба) албан ёсны мэдэгдэлд анхаарлаа хандуулах хэрэгтэй гэж хэлжээ.

Шелехов дахь Эрхүүгийн хөнгөн цагааны үйлдвэрийн захирал Артем Фоминых бямба гарагт “Telegram” сувгаар дамжуулан ажилтнууддаа урьдчилан сэргийлэх зорилгоор амны хаалт зүүхийг үүрэг болгож, тайван байхыг уриалахын зэрэгцээ "Хожим харамсахаас урьдчилан сэргийлэх нь дээр" гэж мэдэгдсэн байна. Дэлхийн эрүүл мэндийн байгууллагаас уушгины тахлыг тахлын ховор боловч хүнд хэлбэр гэж тодорхойлдог бөгөөд энэ нь ихэвчлэн жижиг хөхтөн амьтад болон тэдгээрийн бөөсөнд агуулагддаг *Yersinia pestis* (тахлын савханцар) нянгаар үүсгэгддэг өвчин гэдгийг онцолсон байна.

Лондоны Империал коллежийн бактерийн вакцин судлалын чиглэлээр ажилладаг клиник анагаах ухааны дэд профессор, доктор Малик Гибани "Лабораторид халдварт өртсөн байж болзошгүй тохиолдолд халдвар авсан байж болзошгүй хүмүүсийг илрүүлж, эрсдэлийн түвшингээс хамааран тэдэнд хяналт тавих нь хэвийн үзэгдэл юм" гэжээ.