Хүнс, хөдөө аж ахуй, хөнгөн үйлдвэрийн сайдын А/356 дугаар тушаалаар байгуулагдсан Монгол Улсаас БНХАУ, БНСУ-д хийх хөдөө аж ахуйн гаралтай бараа, бүтээгдэхүүний экспорт, худалдааг нэмэгдүүлэх, хамтын ажиллагааг өргөжүүлэх чиглэлээр санал боловсруулах ажлын хэсгийн анхдугаар хуралдаан өнөөдөр боллоо. 
Хүнс, хөдөө аж ахуй, хөнгөн үйлдвэрийн сайд Ц.Идэрбат ажлын хэсгийн хуралдаанд оролцож, БНХАУ, БНСУ болон Зүүн өмнөд Азийн орнууд руу гаргах хөдөө аж ахуйн гаралтай бүтээгдэхүүний экспортыг нэмэгдүүлэх асуудлаар санал солилцов. 
Ажлын хэсгийг ХХААХҮЯ-ны Бодлого, төлөвлөлтийн газрын дарга Ц.Болорчулуун ахалж байгаа бөгөөд бүрэлдэхүүнд нь ХХААХҮЯ-ны холбогдох газар, хэлтсийн дарга, мэргэжилтнүүд, Гадаад харилцааны яам болон Ургамал хамгааллын газар, Мал эмнэлгийн газрын төлөөлөл багтаж буй юм.
Сайд Ц.Идэрбат Монгол Улсаас БНСУ, Япон зэрэг улсууд руу таримал ургамал, ургамлын гаралтай бүтээгдэхүүн экспортлох боломжийг судлах, экспортын гарцыг шийдэх шаардлагатай байгааг онцоллоо. Ажлын хэсгийн уулзалтад Гадаад харилцааны яамны Олон улсын худалдаа, эдийн засгийн газрын зөвлөх Ч.Сүнжидмаа, Хөрш орнуудын газрын 3-р нарийн бичгийн дарга Д.Нямаа нар оролцож, хөрш болон зүүн өмнөд Азийн улс орнууд руу хөдөө аж ахуйн гаралтай бараа, бүтээгдэхүүн экспортлох асуудлаар болон ирэх 11-р сард ХХААХҮ-ийн сайдын БНХАУ-д хийх айлчлалын бэлтгэл ажлын талаар санал солилцов.