Японы Окинава мужийн нэгэн зочид буудалд эмэгтэй хүний цогцос олдсоны дараа АНУ-ын тэнгисийн цэргийг сэжиглэн баривчилжээ. Японы Ерөнхий сайд Такаичи Санаэ эл гэмт хэргийг “харгис, жигшүүрт” аллага, дээрэм гэж нэрлэж, Америк цэргийн удирдлагуудыг доод тушаалын хүмүүсийнхээ дунд сахилга бат чандлан мөрдүүлэхийг шаарджээ.
Японы үндэсний телевиз ЭнЭйчКэйгийн мэдээлснээр хохирогч нь 39 настай Яги Анна бол сэжигтэн нь АНУ-ын Тэнгисийн цэргийн агаарын цэргийн алба хаагч 20 настай Девин Жекоб Баллард гэнэ. “Манай талаас Японы эрх баригчидтай идэвхтэй хамтран ажиллаж, Тэнгисийн цэргийн үйлдсэн онц ноцтой гэмт хэргийг шалгаж байгаа” гэж АНУ-ын Тэнгисийн цэргийн корпус сошиал медиагаар дамжуулан мэдэгдээд хохирогчийн ар гэрт гүн эмгэнэл илэрхийлсэн байна.

Японы Батлан хамгаалахын сайд Шинжиро Коизүми хохирогчийн цогцос өнгөрсөн бямба гарагийн өглөө Окинава мужийн төв Наха хотын нэгэн зочид буудлаас олдсон гэж мэдээллээ. Энэ хэргээс улбаалан нутгийн иргэд болон америк цэргүүдийн дунд маргаан, мөргөлдөөн үүсгэж болзошгүй тул албаныханд сэрэмжтэй байхыг даалгаж, үймээн самуун дэгдэх учиргүйг сануулсан байна. Токио дахь АНУ-ын Элчин сайдын яамнаас Японы Засгийн газар, орон нутгийн цагдаагийн газартай хамтран ажиллаж байгаа гэлээ. Харин Японы Гадаад хэргийн яамнаас АНУ-ын Элчин сайд Жорж Глассыг дуудан уулзаж, гарсан хэргийн талаар зөвлөлдсөн байна.