Гүнгийн авхай Дианагийн дүү Чарльз Спенсер өөрийн шинэ ном болох "Swan Song: Diana, My Sister"-т дурдагдсан зарим асуудлын талаар Букингемийн ордны гаргасан мэдэгдэлд хариу тайлбар өгчээ. АНУ-д телевизийн шууд нэвтрүүлэгт анх удаа оролцохдоо тэрбээр "CBS Mornings" нэвтрүүлгийн хөтлөгч Гэйл Кингт хандан "Тэд хүмүүсийг төөрөгдүүлдэг. (gaslight) Тэд миний сэтгэцийн эрүүл мэнд эсвэл ой санамжид асуудал байгаа мэт дүр эсгэдэг.

Гэтэл үнэндээ аль алинд нь ямар ч асуудал байхгүй" гэж хэлсэн байна. Спенсер уг номондоо III Чарльз хаан (тухайн үедээ хунтайж Чарльз байсан)-тай хийсэн яриагаа дурссан байдаг. Энэхүү яриа нь хунтайж Уильям, Харри нар Дианагийн оршуулгын цуваанд алхах тухай байв. Дианагийн хөвгүүд ээжийнхээ авсны ард алхахыг Спенсер эсэргүүцэхэд Чарльз түүнд "Санаа зоволтгүй дээ, бид түүнийг удахгүй мартах болно" хэмээж байжээ. Букингемийн ордон энэ сарын эхээр гаргасан мэдэгдэлдээ уг асуудалд хариу өгөхдөө, “Ах дүүсийн хагацлын уй гашуу нь ухаан санааг самууруулж, шийдвэр гаргалтад нөлөөлж, дурсамжийг өөрөөр эргэцүүлэхэд хүргэж болдгийг ойлгож байна" гэжээ.

Спенсер өөрийн хэлсэн зүйлээ батлан "Би тэгж сонссоноо сайн мэдэж байна. Би тухайн үед хүмүүст энэ тухай ярьж байсан. Бүр Барбара Уолтерст ч хэлж байсан" хэмээн  "CBS Mornings" нэвтрүүлэгт ярьсан байна. Спенсер ном хэвлэгдэн гарснаас хойш Уильям, Харри нартай ярилцсан гэдгээ мөн дурдсан байна. Спенсер уг номыг Диана гүнжийг нас барснаас хойш бараг 30 жилийн дараа хэвлүүлэх гэж байгаа вм. 1997 онд болсон Диана гүнжийн оршуулгын ёслолын үеэр хэлсэн эмгэнэлийн үгээ эргэн дурсахын зэрэгцээ Спенсер энэхүү номоороо Дианаг алдаршуулахыг хүсэж буйгаа илэрхийлжээ.