Шүгэл үлээгч

МАН-ын захиалгаар О.Цогтгэрэлийн оронд С.Баярцогт, Б.Ган-Очирын оронд Ч.Лодойсамбуу очно

59 мин өмнө
Намрын улс төрийн гол сэдвээр МАН-ын 30, 38-ын хагарал жин дараад байгаа болохоос АН-ын дотоод асуудал илүү уршигтай өрнөхөөр болчхоод байна. Учир нь хойтон жил болох Ерөнхийлөгчийн сонгуулийн үр дүнг чухамдаа энэ нам л шийдэх билээ. Тэгвэл яг ямар үйл явдал өрнөв. Ц.Элбэгдорж дэлхий дахинд санаа тавьдаг тэтгэврийн хөгшний дүрээсээ гарч эх орондоо ирсэн даруйдаа улс төрийн мэдэгдэл хийв.
 
Э.Бат-Үүл баатартай хийсэн ярилцлагыг ерөнхийд нь харвал Л.Оюун-Эрдэнийг зүйл бүрээр муушааж, У.Хүрэлсүхийг дэмжсэн өнгө аяс илтэд илэрхийлжээ. Залгаад тагнуулч Б.Хурц Төрийн ордонд “О.Цогтгэрэл огцрох ёстой. МАН-ын эрх баригчдаас олон тэрбумын тендер авсан ийм хүн намын дарга байх ёстой юу” гэж шуудхан хэлэв.

АН-ын эмэгтэйчүүдийн хамгийн туршлагатай төлөөлөл УИХ-ын гишүүн С.Одонтуяа ч цахим орчинд бичсэн нийтлэлээ шууд О.Цогтгэрэлд чиглүүлсэн. Түүнийг намаа хагалж бутаргасан, ахмад гишүүдээ хөөж туусан гомдол аниагүй байна гэж бичжээ. Хоорондоо хэлхээ бат хүмүүсийн нэг, хоёр өдөрт гаргасан эдгээр үйлдэл санамсаргүй өрнөсөн гэвэл тун гэнэн хэрэг юм.

Товчхондоо, Ц.Элбэгдорж эртний өст Х.Баттулга болоод түүний дэмжлэгээр намын дарга, УИХ дахь бүлгийн даргыг давхар хашиж буй О.Цогтгэрэл нарыг цэвэрлэх цаг болжээ гэж үзсэн бололтой. Цаг болсныг ч МАН доторх дэмжлэг нь шавдуулж буй биз. Улстөрчид хэзээ ч тус тусын намын тогоогоор хашигддаггүй онцлогтой.

Саяхны түүх сөхөхөд Л.Оюун-Эрдэнэ чухамдаа Х.Баттулгын ачаар л сонгуульд ялалт байгуулж, Засгийн газар нь 4 жил тэссэн гэхэд болно. Харин У.Хүрэлсүхийн хувьд Х.Баттулга бол толгойны өвчин. Л.Оюун-Эрдэнэ тэргүүтэй босогчдоо нэгмөсөн дарж авъя гэвэл холбоотонтой нь хамт дуусгах учиртай. Мөн хойтон жилийн Ерөнхийлөгчийн сонгуульд хүссэн залгамжаа үлдээе гэвэл АН-ын дотор өөрийнх нь хүмүүс хэрэгтэй. Тэр тусмаа зөөлөн боорцог байх ёстой. Нэн эртнээс буюу С.Баярцогтын хэрэг прокурор дээр хэрэгсэхгүй болох үеэс У.Хүрэлсүхийн захиалга гэсэн хардлага байсан. АН-ын өнөөдөр байгаа удирдлагуудыг солиход С.Баярцогт нөхөөд ороод ирэх боломжийг ч өнгөрсөн хэдэн жилд бүрдүүлээд байгаа. АН-ын яг ийм нөхцөл нь Ерөнхий сайд Н.Учралд ч олон давуу тал авчирна.
 
Тэгэхээр зураг ингэж гарчээ. О.Цогтгэрэлийг намын даргаас буулгах нь цаг хугацааны асуудал болжээ. Түүний оронд С.Баярцогтыг тавих нь МАН, АН-ын аль аль талд таалагдаж байгаа аж. Бүр цаашилбал, Ерөнхийлөгчийн сонгуульд нэр дэвшүүлэх ч асуудал хөндөгдөнө. Хэрэв С.Баярцогт нэр дэвшвэл тодорхой хэдэн асуудлыг нь сануулж сөхөөд л олон нийтийн дунд нэр хүндийг нь амархан унагаж болно.

МАН талд ялалт бат шилжинэ гэсэн үг. Нөгөөтээгүүр Х.Баттулгын гарын хүн гэгдэх Б.Ган-Очирыг нийслэлийн АН-ын даргаас буулгаж Ч.Лодойсамбууг тавих яриа ч гарч. О.Цогтгэрэл тэгтлээ хажиглаад Үндэсний бодлогын хороондоо ч оруулахгүй байсны учир энд тайлагдаж байна. Ч.Лодойсамбуугийн хувьд Америкт хэсэг хугацаанд амьдрахдаа Ц.Элбэгдоржтой тун ойр шадарласан. Мөн Ерөнхийлөгч У.Хүрэлсүх, Ерөнхий сайд Н.Учрал нарт тун ч таалагдаж буй нь хэн хэндээ хожоотой хувилбар юм. Нүдэнд ил болж буй эл явдлыг О.Цогтгэрэл мэдээд барахгүй өнөөдөр Төрийн ордонд ярилцлага өгөхдөө ч дурдсан байна лээ. Гэлээ гээд яахав дээ, хэн хүчтэй нь дийлдгээс хойш.
 

Холбоотой мэдээ

Засгийн газрын гишүүнийг огцруулж, Хууль зүй, дотоод хэргийн сайд тангараг өргөв
122 дугаар сургууль шүдний кабинеттэй боллоо
"Автомашингүй өдөр"-өөр нийтийн тээврийн 43 чиглэлийг түр өөрчилнө

Сэтгэгдэл бичих

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.
Сэтгэгдэл 0