Барилгын бизнестэй Э.Бат-Амгалан зорилтот бүлгийн орон сууцны төслийг ашиглан үл хөдлөх хөрөнгийн үнийг зохиомлоор хөөрөгдөж байна

Улаанбаатар хотын хэмжээнд өндөр орон сууц, тансаг хаус хорооллыг хэдэн арваар нь сүндэрлүүлж буй хувийн бизнестэй Барилга, хот байгуулалт, орон сууцжуулалтын сайд Э.Бат-Амгалан үл хөдлөх хөрөнгийн салбарт зохиомол үнийн хөөрөгдөл үүсгэж байна уу гэдэг хардлага явах боллоо.

Учир нь “Солонго 1, 2” төсөл хэрэгжиж буй Буянт-Ухаа нисэх буудал орчимд орон сууцны ханш 1 м.кв- т нь 2.5-3.5 сая төгрөгийн үнэтэй байгаа. “Солонго 1, 2” төслийн зэргэлдээ хувийн хэвшлийн барьсан “Эвэл апартмент” гэх хорооллын орон сууц 1 м.кв нь 2.9-3.5 сая төгрөгөөр зарагдаж байна. Зөвхөн энэ харьцуулалтаас “Солонго 1, 2” төсөл зорилтот бүлгийн иргэдийг орлогод нийцсэн орон сууцаар хангах үндсэн зорилгодоо нийцэхгүй байгааг болно.

Мөн хотын төвөөс 2 км-ийн зайд хэрэгжиж буй Сэлбэ дэд төвийн дахин төлөвлөлтийн хүрээнд баригдаж буй орон сууцны үнэ 1 м.кв нь 3.9 сая төгрөг байна гэдгийг хотын дарга Б.Пүрэвдагва зарласан. Сэлбэ дэд төвийн бүтээн байгуулалт арилжааны шугамаар хэрэгжиж буй. Улаанбаатар хот олон улсын зах зээл дээрээс босгосон бондын мөнгөөр эргэн төлөгдөх нөхцөлтэй санхүүжүүлж байгаа төсөл. Энэ утгаараа Солонгосын Засгийн газрын хөнгөлөлттэй зээлээр баригдаж буй “Солонго 1, 2” төслийн үл хөдлөх үнэлгээний хувьд Сэлбэ дэд төвийн бүтээн байгуулалттай өрсөлдөх ямар ч боломжгүй. Үнэтэй байх ямар ч үндэслэлгүй юм.

Тиймээс Э.Бат-Амгалан “Солонго 1, 2” төслийн орон сууцны үнийг тогтоосон тооцоо судалгаагаа олон нийтэд ил тод тайлбарлах ёстой. Хэрэв тайлбарлаж чадахгүй бол ашиг сонирхлын хэргээр хуулийн байгууллагад тайлбараа өгөх шаардлага үүснэ.