“Мулхолланд зам”, “Хөх хилэн”, “Хос оргил” гэх зэрэг кино урлагийн салбарт гүн мөр үлдээсэн олон бүтээлийг туурвисан найруулагч, зохиолч, продюсер Девид Линч өчигдөр 78 насандаа нас баржээ. Түүний ар гэрийнхэн алдарт найруулагчийн албан ёсны Фейсбүүк хуудсаар дамжуулан мэдэгдэл хийхдээ:

“Нэгэн цаг үеийн уран бүтээлч Девид Линч нас барж, ар гэрт нь хүнд гарз хохирол учирсан мэдээг дуулгаж буйдаа харамсаж байна. Уй гашуу тохиосон энэ үед бид тайван байхыг хүснэ. Тэр биднийг орхин одож, энэ ертөнцөд томоохон орон зай хоосон үлдлээ. Гэхдээ түүний хэлдэгчлэн нүх рүү биш цагариган боов руу нь хар гэх үгийг нь санаарай. Цэлмэг тэнгэрт алтан нар мандсан сайхан өдөр байна.” Гэв.

Хэвлэлүүд Девид Линчийн нэрэмжит сантай холбогдож, үхлийн шалтгааныг нь тодруулах гэсэн боловч дэлгэрэнгүй мэдээлэл олж авч чадаагүй байна.

Девид Линч киноны салбарт 50 гаруй жил ажиллахдаа хийсвэл хэв маягтай, цаг тооллын эмх замбараагүй урсгал, үсрэлт, ер бусын үзэгдэл, элементүүдийг харуулсан бүтээл туурвидгаараа онцлогтой. Энэ ч утгаараа амьдралыг кино урлагт хөрвүүлэгч хэмээн дэлхийн кино урлагийн салбарынхан үнэлдэг юм. Тэрээр 2006 онд Венецийн кино наадмаас Насан туршийн ололт шагнал хүртэж, Алтан арслангийн эзэн болж байсан бол 2019 онд нэг насаараа урлагийн өндөр ололтод хүрсэн хэмээн Оскарын хүндэт шагналыг хүртээж байжээ. Мөн “Хүн заан”, “Хөх хилэн”, “Мулхолланд зам” кинонуудаараа Оскарын наадмын “Шилдэг найруулагч”  номинацид гурван удаа нэр дэвшжээ.