Хятадын улс төрийн удирдагчид болон элитүүд даваа гарагт эрх баригч Коммунист намын сахилга батыг бэхжүүлэх талаар хэлэлцэх дөрвөн өдрийн уулзалтыг эхлүүлсэн бөгөөд Хятадын дарга Ши Жиньпин авлигын эсрэг олон жилийн кампанит ажлаа гүнзгийрүүлэхийн зэрэгцээ албан тушаалтнуудаас илүү үнэнч, найдвартай байхыг шаардаж байна.

Энэ долоо хоногт Хятадын Коммунист намын Төв хорооны тавдугаар чуулган гэгддэг хаалттай хурал нь Ши намын удирдагчийн дөрөв дэх таван жилийн бүрэн эрхээ баталгаажуулж, гол удирдлагын байгууллагуудад боловсон хүчний өөрчлөлт хийхээс жилийн өмнө болж байна. Хятадын албан ёсны Синьхуа агентлагийн мэдээлснээр, Ши ажлын тайлангаа танилцуулж, намын өөрөө удирдах ёсыг урагшлуулах бодлогын шийдвэрийн төслийн талаар үг хэлснээр уулзалтыг эхлүүлжээ.

Энэхүү бодлого нь боловсон хүчнийг илүү сахилга баттай, үр дүнтэй, авлига багатай болгох зорилготой аж. Лондон дахь "Тони Блэйрийн Дэлхийн өөрчлөлтийн хүрээлэн"-гийн (Tony Blair Institute for Global Change) бодлогын ахлах зөвлөх Руби Осман хэлэхдээ "Энэхүү бүгд хурал нь албан тушаалын шатаар дээш дэвшиж буй шинэ үеийнхэн Хятад улсын өмнө тулгарч буй боломж, эрсдэлийн талаарх Ши Жиньпиний үзэл бодолтой нэгдмэл байх нөхцөлийг бүрдүүлэх боломж юм" гэжээ.

Ши Жиньпин 2012 онд засгийн эрхэнд гарснаасаа хойш эхлүүлсэн авлигын эсрэг тэмцэл нь түүний засаглалын гол онцлог болсоор ирсэн. Тэрбээр  улс төрийн өрсөлдөгч гэж үздэг албан тушаалтнуудыг, түүний дотор заримыг нь цэвэрлэсэн нь шүүмжлэгчид түүнийг энэхүү кампанит ажлыг ашиглан эрх мэдлээ бэхжүүлэхэд ашигласан гэж маргахад хүргэсэн.

"Eurasia Group"-ийн Хятад хариуцсан ахлах шинжээч Мингда Цю "Албан тушаалтнуудыг зөвхөн үнэнч эсэхээр нь бус, харин дүрэм журмыг мөрдөж буй эсэх, бодит үйлдэл гаргаж байгаа эсэхээр нь ч шалгаж байна" гэжээ.

Намын Төв хорооны хэвлэл болох "Цюши" (Qiushi) сэтгүүлийн 10 дугаар сарын дугаарт гарсан нийтлэлд дурдсанаар, Ши Жиньпин нэгдүгээр сард болсон хурал дээр хэлэхдээ, намын дээд удирдлагын шийдвэрүүд ерөнхийдөө саадгүй хэрэгжиж байгаа хэдий ч шалгалт, аудитын явцад дүрэм журмыг мөрдөөгүй, эсвэл буруу хэрэгжүүлсэн зэрэг асуудлууд илэрсэн гэжээ. Ши Жиньпин улс төрийн хувьд үнэнч мэт дүр эсгэсэн хэрнээ, цаана нь тушаал шийдвэрийг зөрчиж, дураараа авирладаг "хоёр нүүртнүүд"-д анхааруулжээ. "Удирдлага солигдох үед бид сонор сэрэмжтэй байж, үнэхээр үнэнч, найдвартай, хэлсэн үгэндээ эзэн болдог, хариуцлага хүлээх чадвартай сайн боловсон хүчнүүдийг дэвшүүлэх ёстой. Харин “хоёр нүүртнүүд” болон хувийн ашиг сонирхлоо л боддог хүмүүсийг хэзээ ч шургуулж болохгүй" хэмээн Ши Жиньпин хэлснийг эх сурвалж иш татсан байна.

"Asia Society Policy Institute"-ийн ахлах судлаач Нийл Томас болон түүний хамтран зүтгэгчид болох Лобсанг Церинг, Шэнъю Ван нар “Ши Жиньпин төрийн албан хаагчдын дунд явуулсан цэвэрлэгээгээрээ дээд амжилт тогтоосон бол, 2022 онд Төв хорооны бүрэн эрхт гишүүнээр сонгогдсон цэргийн салбарын 44 албан тушаалтны 42 нь мөн адил албан тушаалаасаа буусан эсвэл сураггүй алга болсон” гэжээ. Төв хороо 2022 онд 370 гаруй бүрэн эрхт болон орлогч гишүүнтэйгээр үйл ажиллагаагаа эхлүүлж байв. Томас болон түүний багийнхны тооцооллоор, энэ долоо хоногийн хуралд оролцох гишүүдийн ирц 80 хувиас доош буусан байж магадгүй бөгөөд энэ нь 1976 онд хуучин удирдагч Мао Зэдуны засаглал өндөрлөснөөс хойших бүх хурлуудын түүхэн дэх хамгийн бага ирц болж болзошгүй аж.

Мөн албан тушаалдаа үлдсэн хүмүүст тавих шаардлага, хяналт чангарах төлөвтэй байна. Томасын таамаглаж байгаагаар, төсвийн зарцуулалт болон томоохон төслүүдэд тавих хяналт чангарч, авлигыг илрүүлэхэд технологийн хэрэглээ нэмэгдэхийн зэрэгцээ Ши Жиньпиний тэргүүлэх зорилтуудыг биелүүлж чадаагүй албан тушаалтнуудад илүү хатуу хариуцлага тооцох магадлалтай байна. Лондон дахь SOAS Хятад судлалын хүрээлэнгийн захирал Стив Цангийн хэлснээр, шинэ томилгоонууд хийгдэж болзошгүй ч, Ши Жиньпин өөрийн сонгосон хүмүүсээ албан ёсоор томилохын тулд ирэх жил болох, таван жилд нэг удаа зохион байгуулагддаг Коммунист намын их хурлыг хүлээж магадгүй юм. Хэрэв тэрээр сул орон тоонуудыг нөхөхөөр шийдвэл, зөвхөн өөрт нь үнэнч хүмүүсийг л томилох болно гэжээ.

2018 онд Ерөнхийлөгчийн бүрэн эрхийн хугацааны хязгаарлалтыг арилгасан Ши нь Маогийн дараах хамгийн хүчирхэг Хятадын удирдагч юм. Түүнийг 2027 оны намар намын дараагийн даргаар батлах төлөвтэй байна.

Тэрбээр чуулганаар Шигийн дөрөв дэх бүрэн эрхийн суурийг бэлтгэж, улс төр, бодлогын залгамж чанарын хүлээлтийг бэхжүүлэх ёстой гэв.

Ши өнгөрсөн их хурлаар дэвшүүлсэн олон хүнийг цэвэрлэсний дараа түүний дараагийн удирдлагын багт элсэхээр өрсөлдөж буй албан тушаалтнуудыг илүү хатуу шалгах хэрэгтэй гэжээ.