Дэлхий дахин ,Гаднын хэвлэлд

Ханхүү Харри: Хаан Чарльз болон Ханхүү Уильям нартай харилцаагаа сэргээхийг минь зарим хүмүүс хүсэхгүй байна

1 цаг 17 минут
Ханхүү Харри "GQ" сэтгүүлд өгсөн, дүрс бичлэг бүхий ярилцлагаараа олны анхаарлыг татав. Уг ярилцлагыг есдүгээр сарын сүүлчээр бичүүлсэн байна. Тэрхүү ярилцлагадаа Харри, өөрийг нь Хаан Чарльз болон Ханхүү Уильям нартай харилцаагаа сэргээхийг "зарим хүмүүс хүсэхгүй байна" гэсэн санааг цухуйлгажээ.

Ах, аавтайгаа харилцах харилцаа нь ээдрээтэй байгаадаа сэтгэл шаналж байгаа эсэхийг асуухад Харри "Тийм ээ, мэдээж" гэж хариулжээ. Тэрбээр гэр бүл дэх ийм ээдрээтэй харилцааг олон хүнд тохиолддог. Зарим хүмүүс үүнийг эвлэрлээр дуусаасай гэж хүсэхгүй байна. Харин би үүнийг эвлэрлээр дуусаасай гэж хүсэж байна. Мэдээж хэрэг шүү дээ. Дэлхий ертөнцөд өрнөж буй бусад бүх үйл явдлыг бодож үзвэл, хамгийн чухал зүйл бол эвлэрэх явдал юм. Энэ бол гол асуудал" хэмээсэн байдаг.

“HELLO” сэтгүүлийн хааны гэр бүлийн асуудал хариуцсан сурвалжлагч Эмили Нэшийн хэлснээр, уг ярилцлагад задлан шинжлэх зүйлс олон байсан бөгөөд тэдгээрийн дотроос хамгийн онцлох нь Харри өөрийн зүгээс харилцаа муудахад томоохон хувь нэмэр оруулснаа хүлээн зөвшөөрөхөөс татгалзсан явдал аж. "A Right Royal Podcast"-ын хамгийн сүүлийн дугаарт оролцохдоо Эмили "Тэрбээр харилцаа нь эвдэрсэнд харамсаж буйгаа ярьж, мөн сүүлийн зургаан жилийг ардаа орхиж, шинэ хуудас нээхийг хүсэж байгаагаа дурдсан. Үүнийг сонсоод миний толгойд шууд л “Чи тэгэхийг хүсэж байж болох ч, гэр бүлийн бусад гишүүд үүнд бэлэн эсэхийг чи яаж мэдэж байгаа юм бэ” гэсэн бодол орж ирсэн.

Миний анхаарлыг хамгийн их татсан зүйл бол түүний гэр бүлийнхэндээ гомдол, шарх учруулсан үйл явдлууд — тухайлбал Опратай хийсэн ярилцлага, “Netflix”-ийн баримтат цуврал, 'Spare' ном зэрэг юм. Харри уучлалт гуйх шаардлагагүй гэж бодож байж болох ч, хэрэв хэн нэгэнтэй харилцаагаа засаж, эвлэрэхийг хүсэж байгаа бол хамгийн түрүүнд өөрийнхөө ч бас алдаа гаргасныг хүлээн зөвшөөрөх хэрэгтэй шүү дээ" гэжээ.

Ярилцлагын өөр нэг хэсэгт Харригаас Хаан болон Уильямтай харилцаагаа сэргээж чадна гэж бодож байгаа эсэхийг асуухад "Мэдээж хэрэг," гэж Харри хариулсан байна. Ханхүү Харри "Мегзит"-ээс (Megxit) хойш өөрийнх нь хандлага өөрчлөгдсөн гэж мэдэгдэв.

Сэтгүүлч түүнээс зургаан жилийн өмнө Харри, Меган хоёрыг явахад хүргэсэн шалтгаанууд өнөөдөр өөрчлөгдсөн эсэхийг асуужээ. Тэрбээр "Бидний хандлага гарцаагүй өөрчлөгдсөн гэж бодож байна. Тэр үед болсон зүйлс бол өнгөрсөн цаг үеийнх. Сүүлийн зургаан жилийн үйл явдлууд бол үүний үргэлжлэл байлаа. Зарим нэг тэмцэл өрнөсөн, гэхдээ энэ нь зайлшгүй байсан хэрэг. Одоо харин бид бүгд үүнийг ардаа орхиж, шинэ хуудас нээнэ гэж найдаж байна" хэмээн хариулжээ. Тэрбээр цааш нь "Би гэнэн хүн биш л дээ, урьд нь тийм байсан үе бий. Гэхдээ өөдрөг үзэлтэй байх нь чухал гэж бодож байна. Үүнд харилцан хүндэтгэл ч чухал үүрэгтэй. Хэрэв тэд намайг болон бидний байр суурийг хүндэтгэвэл би ч тэднийг хүндэтгэж чадна. Бидний байр суурь одоо маш тодорхой болсон” гэжээ.

Гүнгийн хэлсэн үгс нь түүний ах, Ханхүү Уильямыг онилсон мэт сонсогдов. Ирээдүйн хаан болох Ханхүү Уильям дүүтэйгээ эвлэрэх хүсэлгүй байгаа гэх яриа байдаг.

Холбоотой мэдээ

“THEAUSTRALIA”: “Ял шийтгүүлсэн Малайзын алуурчин Австралид эрх чөлөөтэй амьдарсаар байна
Герман улс чихэрлэг ундаанд татвар ногдуулна
Ши Жинпинийг Хятадын Коммунист намын тэргүүний албан тушаалд дөрөв дэх удаагаа томилно

Сэтгэгдэл бичих

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.
Сэтгэгдэл 0