“Эрдэнэс Тавантолгой” ХК-ийн худалдан авах ажиллагааны газрын дарга, гүйцэтгэх захирлын үүрэг гүйцэтгэгч зэрэг албан тушаал хашиж байсан, өдгөө “Гашуунсухайт авто зам” ХХК-ийг удирдаж буй Н.Цэрэнсамбууг Авлигатай тэмцэх газраас хойшлуулшгүй ажиллагааны хүрээнд 48 цаг саатуулаад сулласан. Тус газрын мөрдөгчид, холбогдох бусад албаныхан түүнийг шалгах ажлын хүрээнд хоёр ч объектод прокурорын зөвшөөрсний дагуу нэгжлэг хийсэн аж.

 

Эх сурвалжийн мэдээлж буйгаар Н.Цэрэнсамбууг Эрүүгийн хуулийн 22.1 дэх хэсгийн “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон” гэх заалтыг үндэслэн хэрэг нээн АТГ-ын Мөрдөн шалгах хэлтэст шалгаж эхэлсэн байна. Түүний талаар тендерт оролцсон аж ахуйн нэгжүүдийн удирдлага нь “Эрдэнэс Тавантолгой” ХК-иас зарласан хөрс хуулалтын тендертэй холбоотойгоор албан үүргээ хэрэгжүүлээгүй, гарын үсэг зураагүй гэх үндэслэлээр гомдол гаргасны дагуу мөрдөн шалгах ажиллагааг эхлүүлсэн юм.