Олон тэрбумын өртгөөр “Цаасан дээр сүндэрлэсэн хот” хэмээн шүүмжлэл дагуулдаг Шинэ хархорум хотын бүтээн байгуулалтын асуудал хариуцсан захиргааг удирддаг Л.Халтар гэдэг албан захирагчтай. Түүний дээр Засгийн газрын Хэрэг эрхлэх газрын хатавчинд Хархорум хотын зөвлөл гэж бий. Зөвлөлийг Монгол Улсын гурав дахь Ерөнхийлөгч Н.Энхбаяр удирддаг цол гуншинтай.

Тэд бүгд тусдаа төсөвтэй бөгөөд үргүй зардал гаргаж байгааг олон нийт шүүмжилсээр байна. Шүүмжлэл дагуулсаар ирсэн ч жил ирэх тусам зарцуулах мөнгөн дүн нь өссөөр иржээ. Энэ байдал ирэх онд ч үргэлжлэх юм байна. Ирэх оны төсөвт Хархорум хотын зөвлөлийн дарга Н.Энхбаярын төсвийг 2 дахин нэмэгдүүлэхээр хэлэлцэж байгаа. Зөвлөлийн төсөв 2026 онд 1.4 тэрбум төгрөг байгаа бол 2027 онд 2.8 тэрбум болгож байгаа аж. Тэгвэл “Цаасан дээрх хот”-ын захирагч Л.Халтарын 2027 оны төсөв 4.8 тэрбум төгрөгөөр яригдаж байна. Шинэ хархорум хотын бүтээн байгуулалтын асуудал хариуцсан захиргааны 2026 оны төсөв 4.1 тэрбум төгрөг байгаа. 

Үүнээс гадна Хот байгуулалт, барилга, орон сууцжуулалтын сайд Э.Бат-Амгалан  багцад "Шинэ Хархорум" хотын эхний ээлжийн барилгажилтын төсөл, инженерийн бэлтгэл арга хэмжээ, нэвтрэх хонгилын систем, хоёрдугаар ээлжийн инженерийн шугам сүлжээ болон авто замын ажлын зураг төсөл боловсруулахад 963 сая, Хархорум хотын хөгжлийн ерөнхий болон хэсэгчилсэн ерөнхий төлөвлөгөө боловсруулахад 4 тэрбум төгрөг зарцуулахаар төлөвлөсөн байна.