Монгол Улсын Ерөнхий сайд, Засгийн газраас дэвшүүлсэн “Чөлөөлье” үндэсний санаачилга, зөвшөөрлийн тогтолцооны шинэчлэлийн хүрээнд Эдийн засаг, хөгжлийн яам, Эрчим хүчний яам болон эрчим хүчний салбарын холбогдох байгууллагууд хамтран “Эрчим хүчний салбарын зөвшөөрлийн эрх зүйн зохицуулалт, хэрэгжилт ба бизнесийн орчин” сэдэвт 7 хоногийн арга хэмжээг 2026 оны 10 дугаар сарын 19-21-ний өдрүүдэд Эдийн засаг, хөгжлийн яамны дэргэдэх “Зөвшөөрлийн мэдээлэл, үйлчилгээний нэгдсэн төв”-д зохион байгуулж байна.

Өнөөдрийн арга хэмжээг нээж Эдийн засаг, хөгжлийн яамны Бизнесийн орчны бодлогын газрын ахлах С.Баатархүү, Эрчим хүчний зохицуулах хорооны дарга Л.Жамбаа нар үг хэлж, зөвшөөрлийн тогтолцооны шинэчлэл нь эрчим хүчний салбарт цахим хэлбэрт шилжсэнээрээ хугацаа хэмнэх, ил тод хурдан шуурхай байх нөхцөлийг бүрдүүлж байгаа талаар мөн цаашдаа энэхүү ”Зөвшөөрлийн мэдээлэл, үйлчилгээний нэгдсэн төв”-д нээлттэй мэдээлэл, зөвлөгөөг өгч ажиллахыг онцоллоо. 

Арга хэмжээний хүрээнд оролцогчдод зөвшөөрлийн цахим системийн боломж, өөрчлөлт болон хөгжүүлэлтийн талаар СМТТ УТҮГ-ын Төсөв, санхүүгийн инновац хөгжүүлэлтийн газрын дарга Б.Төгөлдөр мэдээлэл өгсөн бол эрчим хүчний салбарт олгож буй тусгай зөвшөөрлийн төрөл, олголт, сунгалтын статистик мэдээлэл болон “Зөвшөөрөл, мэдэгдлийн тухай” хууль хэрэгжиж эхэлсэнтэй холбоотой эрх зүйн зохицуулалтын өөрчлөлт, зөвшөөрөл шийдвэрлэх хугацааны талаар Эрчим хүчний зохицуулах хорооны тусгай зөвшөөрлийн газрын дарга Х.Номинбилэг танилцууллаа. 

Мөн тусгай зөвшөөрөл шинээр олгох, сунгах, үйлчлэх хүрээг нэмэгдүүлэх хүсэлтийг цахимаар шийдвэрлэх ажиллагаа, бүрдүүлэх баримт бичгийн жишиг маягт болон зөвшөөрлийн нэгдсэн системтэй мэдээлэл солилцож буй байдлын талаар тус газрын мэргэжилтэн С.Тэмүүлэн, тусгай зөвшөөрөл эзэмшигчдийн үйл ажиллагаа, цаашид нөхцөл, шаардлагыг давхардалгүй, ойлгомжтой болгож цахимжуулах, тайлан мэдээллийг тогтоосон хугацаанд хүлээн авах, үнэлгээний аргачлал, босго оноог тодорхой болгох, эрсдэлд суурилсан хяналт хэрэгжүүлэх чиглэлээр ажиллаж буй талаар мэргэжилтэн Э.Чанцалдулам нар мэдээлэл өгч, оролцогчдод холбогдох хууль тогтоомжийн хэрэгжилт, цахим системийн үйл ажиллагаа болон тусгай зөвшөөрөлтэй холбоотой зохицуулалтын талаар танилцуулж холбогдох асуудлын хүрээнд санал хэлэцүүлэг зохион байгууллаа.

Мөн арга хэмжээний хүрээнд эрчим хүчний салбарын зөвшөөрөл, үйлчилгээтэй холбоотой асуудлаар иргэн, аж ахуйн нэгжүүдэд мэдээлэл, зөвлөгөө өгөх зорилгоор Улаанбаатар цахилгаан түгээх сүлжээ ТӨХК болон Улаанбаатар дулааны сүлжээ ТӨХК-ийн холбогдох ажилтнууд “Зөвшөөрлийн мэдээлэл, үйлчилгээний нэгдсэн төв”-д байрлан ажиллаж, иргэн, аж ахуйн нэгжүүдэд ганцаарчилсан зөвлөгөө, мэдээлэл өгч байна. “Эрчим хүчний салбарын зөвшөөрлийн эрх зүйн зохицуулалт, хэрэгжилт ба бизнесийн орчин” сэдэвт арга хэмжээ 2026 оны 10 дугаар сарын 19–21-ний өдрүүдэд Засгийн газрын XI байрны 1 дүгээр давхарт байрлах “Зөвшөөрлийн мэдээлэл, үйлчилгээний нэгдсэн төв”-д үргэлжилнэ.