Төрд буцаан аваад хэдэн жилийн нүүр үзэж буй Сэлэнгэ аймгийн Сайхан сум буюу Хөтөл тосгон дахь “Цемент шохой” ХХК-ийн удирдах албан тушаалтнуудад Нийслэлийн прокурорын газраас яллах дүгнэлт үйлдэн орон нутгийн шүүхэд шилжүүлжээ. Авлигатай тэмцэх газрын ажлын хэсгийнхэн 2025 оны арваннэгдүгээр сард тус компанид шалгалт хийж, багагүй хэмжээний хохирол учирсныг нь тогтоон нөхөн төлүүлэх арга хэмжээ авч байсан.

Тодруулбал, “Цемент шохой” ХХК-ийн удирдах албан тушаалтнуудыг ашиг сонирхлын зөрчил удаа дараа гаргаж, эрх мэдлээ урвуулан ашиглан, өөрсдөдөө болон бусдад давуу байдал бий болгож, цемент борлуулахдаа хахууль авсан, төрийн өмчит компанид их хэмжээний хохирол учруулсан байж болзошгүй үндэслэлээр шалгаж эхэлсэн юм. АТГ-ын явуулсан мөрдөн шалгах ажиллагааны явцад тус компанийн бүтээгдэхүүнийг зах зээлийн ханшаар худалдан авах иргэн, аж ахуйн нэгж байсаар атал хууль, журмаа зөрчиж өөрсдийн хамаарал бүхий хүмүүс, аж ахуйн нэгжүүдэд зээлээр олгосон нь тогтоогдсон гэдэг.

Тухайлбал, уг хэрэгт холбогдуулан “Цемент шохой” ХХК-ийн гүйцэтгэх захирлаар ажиллаж байсан Д.Баттүвшин, Санхүү, удирдлагын газрын дарга А.Сосорбурам, Борлуулалтын хэлтсийн дарга Ж.Мандахбаяр нар нэр бүхий аж ахуйн нэгжүүд төлбөрөө дараа төлөх боломж бүрдүүлж, компанийн холбогдох дүрэм, журмыг зөрчин нэгэнд нь 1.6 тэрбум гаруй төгрөгийн үнийн дүнтэй 5.8 тонн, нөгөөд нь 550 орчим саяар үнэлэгдэх гурван тонн цемент зээлээр олгосон аж.
 

Мөн тус компанийн Стратеги төлөвлөлт, бизнес хөгжлийн газрын даргаар ажиллаж байсан Г.Ганхуяг нэгэн аж ахуйн нэгжээс гаргасан хүсэлтийн дагуу 2.5 тэрбум орчим төгрөгөөр үнэлэгдэх 8.9 тонн цемент зээлээр олгосон, Хуулийн хэлтсийн дарга асан П.Занабазар албан тушаалтнуудтайгаа бүлэглэн худалдан авч буй нүүрсний төсөвт өртөг болон тээвэрлэлтийн хэмжээг дур мэдэн өөрчилж, тоо хэмжээг нь нэмэгдүүлэн өөр аж ахуйн нэгжид давуу байдал бий болгосон хэмээн буруутгагджээ. Эл хэрэгт нийт 10 хүнийг яллагдагчаар татсан бөгөөд тэдэнд Эрүүгийн хуулийн 22.1 дүгээр зүйлийн Эрх мэдэл, албан тушаалын байдлаа урвуулан ашиглаж, бусдад давуу байдал олгосон гэх заалтын дагуу НПГ-аас яллах дүгнэлт үйлдсэн аж.

Тэднээс гадна “Цемент шохой” ХХК-д эрх бүхий албан тушаал хашиж байсан Х.Угтахбаяр, Ж.Бадарч нартай холбоотой, дээрх хүмүүсийнхээс тусдаа үйлдлийг АТГ-т өдгөө үргэлжлүүлэн шалгаж буй гэнэ.