Өдөр тутмын ажлаа дуусгасны дараа гэрлээ унтраагаад хөнжил дотроо тухлан хэвтэхээс илүү сайхан зүйл үгүй ​​билээ. Гэвч энэ энгийн таашаал нь танд өндөр үнэтэй тусаж болзошгүй аж.  Учир нь,  судалгаагаар шөнөдөө есөн цаг унтах нь эрт нас барах эрсдэлийг нэмэгдүүлдэг болохыг тогтоожээ. Долоогоос найман цаг унтах нь хамгийн тохиромжтой байдаг бол үүнээс удаан хугацаагаар унтах нь ямар ч шалтгаанаар нас барах магадлалыг 17 хувиар нэмэгдүүлдэг байна.

Үүний яг тодорхой шалтгаан нь одоогоор бүрэн тодорхой болоогүй байна. Гэсэн хэдий ч удаан хугацаагаар унтдаг хүмүүст цусны даралт ихсэх магадлал өндөр байхаас гадна тэдний биед үрэвсэл үүсэх эрсдэл бусдаас илүү байж болзошгүй байна. Хэт их унтах нь дааврын зохицуулалт болон дархлааны тогтолцоонд сөргөөр нөлөөлж болзошгүй.

Судлаачид 3000 гаруй хүний унтах зуршлыг 30 жилийн турш ажиглан судалжээ. Шөнөдөө долоогоос найман цаг унтдаг хүмүүсийн дунд нас баралтын түвшин хамгийн бага буюу 30 жилийн хугацаанд 1000 хүн тутамд 10.57 тохиолдол бүртгэгдсэн байна.

Харин зургаан цагаас бага хугацаанд унтдаг хүмүүсийн дунд нас баралтын түвшин арай өндөр буюу 10.97 байв. Түүнчлэн есөн цагаас илүү хугацаагаар унтдаг хүмүүсийн хувьд энэ үзүүлэлт дахин нэмэгдэж, 11.27-д хүрчээ. Энэхүү судалгааг явуулсан Тайванийн судлаачид эрт нас барах эрсдэлтэй хүмүүсийг илрүүлэхийн тулд эмнэлгийн мэргэжилтнүүд унтах хугацааг хянаж, үнэлэх шаардлагатай гэж үзэж байна. Тэд "Journal of Sleep Research" сэтгүүлд нийтлүүлсэн өгүүлэлдээ "Унтах хугацаа урт байх нь бүх төрлийн шалтгаант нас баралтын эрсдэл нэмэгдэхтэй холбоотой болохыг бид тогтоосон бөгөөд цусны даралт нь энэхүү хамаарлын тодорхой хэсгийг бүрдүүлж байна” гэжээ. Хэт их унтах нь зүрхний өвчин, 2-р хэлбэрийн чихрийн шижин, таргалалт, мөн ой санамж болон тархины үйл ажиллагаа муудах зэрэг асуудлуудтай холбоотой болох нь эртнээс тогтоогдсон байдаг.