Франц даяар өрнөж буй эсэргүүцлийн жагсаалд дунд сургуулийн сурагчид өдөр ирэх тусам идэвхтэй нэгдсээр байна. Тэдний үйл ажиллагааны ихэнх нь тайван замаар хаалт хийх хэлбэртэй байна. Хууль сахиулах байгууллагынхан 10-р сарын 17-ны бямба гарагт болох ээлжит эсэргүүцлийн жагсаалд бэлтгэж байгаа бол Засгийн газрын зүгээс анхааруулга өглөө.

Засгийн газрын хэвлэлийн төлөөлөгч Мод Брежон "Бүгд Найрамдах Улсын Ерөнхийлөгч залуучуудын санаа зовнил нь үндэслэлтэй болохыг онцолсон. Гэвч энэ санаа зовнилыг улс төрийн зорилгоор ашиглаж, хот суурин газарт хүчирхийлэл, хүлээн зөвшөөрөхийн аргагүй үйл явдлууд өрнөхөд хүргэж байна" гэжээ.

Энэхүү хөдөлгөөн эхэлснээс хойш 6800 гаруй хүн цагдаад саатуулагдсаны 86 хувь нь насанд хүрээгүй хүүхдүүд байжээ. Энэ хугацаанд Цагдаагийн үйл ажиллагаанд хяналт тавьдаг байгууллага (IGPN) 36 удаагийн шалгалтын ажиллагааг эхлүүлээд байна. Ахлах сургуулийн сурагчдын уур бухимдлыг намжаахын тулд Засгийн газар хэд хоногийн өмнө хэд хэдэн арга хэмжээ авахаа зарласан бөгөөд үүнд тодорхой сургуулиудад 3000 орлон багшийг томилон ажиллуулах шийдвэр багтаж байна.