НҮБ-ын шинэ тайланд дурдсанаар, 2010 оноос хойш анх удаа дэлхий дахинд ядуурлын түвшин нэмэгдэж, 1.2 тэрбум хүн нэн ядуу, гачигдалтай нөхцөлд амьдарч байна гэсэн судалгаа гарчээ. Даваа гарагт НҮБ-ын Хөгжлийн хөтөлбөр (UNDP) болон Оксфордын их сургуулиас танилцуулсан уг судалгаагаар, нэн ядуу нөхцөлд амьдарч буй хүмүүсийн тоо 51.5 саяар нэмэгдсэн болохыг тогтоожээ.

108 улсыг багтаасан энэхүү тайланд орлогын хүрээнээс давсан ядуурлыг хэмжиж, эрүүл мэнд, боловсрол, амьжиргааны түвшний хомсдолыг судалдаг. Энэ нь хоол тэжээл, хүүхдийн эндэгдэл, сургууль, цэвэр ус, цахилгааны хүртээмж, ариун цэвэр, орон сууцны нөхцөл зэрэг арван үзүүлэлтийг ашигладаг. Хэрэв  өрхүүд жигнэсэн үзүүлэлтүүдийн гуравны нэгээс доошгүй хэмжээгээр хомсдолд орвол хүмүүсийг цочмог ядууралд амьдарч байна гэж ангилдаг. Ядуу амьдарч буй хүмүүсийн бараг тал хувь нь буюу 534 сая хүн "хүнд" хомсдол гэсэн ангилалд ордог бөгөөд энэ нь индексээр хэмжигддэг үндсэн хэрэгцээний тал хувь нь тэдэнд дутагдаж байна гэсэн үг юм.

Ядууралд өртсөн хүмүүсийн тоогоор Сахарын цөлөөс өмнөх Африк бүс нутаг 616 сая хүнтэйгээр тэргүүлж байгаа бол түүний дараа 393 сая хүнтэй Өмнөд Ази орж байна. НҮБ-ын Хөгжлийн хөтөлбөрийн (UNDP) Удирдах зөвлөлийн дарга Александр Де Кроо энэхүү өсөлтийг дэлхий нийтэд хандсан сэрэмжлүүлэг хэмээн тодорхойлж, олон сая хүн өлсгөлөн, сургууль завсардах, анхан шатны үйлчилгээний хүртээмжгүй байдал зэрэг бие биеэ улам хүндрүүлдэг олон бэрхшээлтэй нүүр тулж буйг анхааруулжээ.

Тайланд дурдсанаар, ядуурлын түвшний өөрчлөлт болон амьжиргааны хомсдолыг хэмжихэд ашигласан мэдээллийн ялгаатай байдлаас гадна хүн амын өсөлт нь энэхүү өсөлтөд нөлөөлсөн байна. Дэлхий даяар ийм хандлага ажиглагдаж байгаа хэдий ч зарим улс орон ахиц дэвшил гаргажээ. Тухайлбал, Египет, Балба, Тажикистан улсуудад ядуу амьдарч буй хүмүүсийн тоо болон эзлэх хувь хэмжээ мэдэгдэхүйц буурсан байна. Харин Нигери улсад өмнө нь гарсан ахиц дэвшил үгүй ​​болж, 2020-иод онд ядуурлын түвшин дахин нэмэгджээ. Ерөнхийдөө 33 улс ядуурлын индексийн үзүүлэлтээ 15 хүрэхгүй жилийн дотор хоёр дахин бууруулж чадсан байна. 

Хятад улс ядуурлыг хамгийн хурдан бууруулсан үзүүлэлтийг харуулжээ. Мөн Вьетнам, Эсватини улсууд ч томоохон ахиц дэвшил гаргасан байна. Дэлхийн банкны есдүгээр сард гаргасан үнэлгээгээр, 2024 онд дэлхий даяар 824 сая гаруй хүн буюу нийт хүн амын арван хүн тутмын нэг нь өдөрт гурав хүрэхгүй ам.долларын орлогоор амьдарч байсан гэж тооцоолжээ.