Хятад улсын Ерөнхийлөгчөөр 14 жил ажиллаж буй, 73 настай Ши Жиньпиний эрүүл мэндийн байдлын талаарх цуу яриа гадаадын хэвлэл мэдээллийн хэрэгслээр дахин гарч эхэлжээ. "The Wall Street Journal" (WSJ) сонины энэ сарын 4-ний өдөр мэдээлснээр, Ши Жиньпин өнгөрсөн сарын сүүлчээр АНУ-ын Ерөнхийлөгч Дональд Трамптай дээд хэмжээний уулзалт хийхээр Вашингтон хотод айлчлах үеэрээ амрах тусгай нөхцөл бүхий өрөө бэлтгэхийг хүссэн байна.

Хятадын албаны хүмүүс Цагаан ордноос Ши Жиньпинд арга хэмжээнүүд хооронд түр амрах тусдаа, хувийн өрөө бэлтгэхийг хүссэн аж. Энэхүү өрөөнд зөвхөн Ши Жиньпин болон түүний гэргий Пэн Лиюань нар л байрласан байна. Түүнчлэн, айлчлалаас нэг сарын өмнө Хятадын тал есдүгээр сарын 24-нд товлогдсон Ши Жиньпин болон Трамп нарын ажлын өдрийн хоолны уулзалтаас татгалзсан байна. Үүнээс өмнө, Энэтхэгийн Шинэ Дели хотод болсон БРИКС-ийн дээд хэмжээний уулзалтын үеэр ч Ши Жиньпиний эрүүл мэндийн талаар эргэлзээ үүсэж байв. Тэрбээр Энэтхэгийн Ерөнхий сайд Нарендра Модигийн зохион байгуулсан, ОХУ-ын Ерөнхийлөгч Владимир Путин болон бусад удирдагчид оролцсон оройн зоогт оролцоогүй юм. WSJ-ийн мэдээлснээр, түүнийг ийнхүү оролцоогүй нь эрүүл мэндийн шалтгаантай холбоотой байжээ.

Ши Жиньпиний эрүүл мэндийн талаарх таамаглал өмнө нь буюу Ерөнхийлөгч болохоос нь өмнө 2012 оны есдүгээр сард, мөн албан тушаал хашиж байх хугацаанд буюу 2019 болон 2024 онд гарч байсан удаатай. Гэвч шинжээчдийн үзэж буйгаар, АНУ-ын Стратеги, олон улсын судалгааны төвийн (CSIS) Хятад судлалын хөтөлбөрийн тэргүүн Эдгар Каган өнгөрсөн сард энэ талаарх цуу ярианд хариу өгөхдөө "Ийм цуу яриа байнга гардаг ч батлагдах нь ховор байдаг. Энэ нь үнэн биш байх магадлалтай" гэжээ.