УИХ-ын Түр хорооноос өнгөрсөн долоо хоногт Хөгжлийн банкинд гарсан их наяд төгрөгөөр яригдах хулгайн хэргийн Нотлох баримтыг шинжлэн судлах сонсгол хийсэн. Сонсгол Хөгжлийн банкнаас зээл олгосон албан тушаалтан, зээлдэгчид болон хамаарал бүхий этгээдүүдийн сүлжээг задалснаараа онцлог байлаа. Энэ үеэр Хөгжлийн банкнаас хэд хэдэн зээлд нэр нь холбогдоод байгаа Ерөнхийлөгч асан Х.Баттулга, “Голомт”-ын Д.Баясгалан болон Сингапурын хятад бизнесмэн Билли Лим Сим Пау нарыг хамаарал бүхий нэгдмэл ашиг сонирхолтой этгээдүүд гэдгийг баталж, тэд нэг компанид хувь эзэмшдэг ашгийн төлөө ажиллдаг болохыг шинжээчдийн зүгээс танилцуулсан. Тодруулбал, “Баян-Исгрийт” компанийн 70 хувийг Д.Баясгалан эзэмшдэг бол Х.Баттулга, Билли Лим Сим Пау нар тус тус 10 хувийг эзэмшдэг.

Тэгвэл Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд "Нэгдмэл сонирхолтой этгээд гэж тухайн нийтийн албан тушаалтантай ашгийн төлөө үйл ажиллагаагаар холбоотой хувь хүн, хуулийн этгээд” хэмээн тодорхойлжээ. Мөн "Ашиг сонирхлын зөрчилтэй гэж ойлгогдохуйц нөхцөл байдал" гэж тухайн нийтийн албан тушаалтан өөрийн нэг ангид сурч байсан болон сурч байгаа этгээд, мөн гишүүнчлэлд нь хамаардаг холбоо, сан, хамтын шийдвэр гаргадаг байгууллага, тэдгээрийн гишүүд, нэг нутгийн хүн гэх зэрэг олон нийтийн зүгээс ашиг сонирхлын зөрчилтэй гэж ойлгохуйц этгээдтэй холбоотой асуудлаар үйл ажиллагаа явуулахыг гэсэн байна. Х.Баттулгыг Ерөнхийлөгч буюу нийтийн албан тушаалтнаар сонгогдон ажиллаж байхад (2018.06.21) түүний нэгдмэл ашиг сонирхолтой этгээд Д.Баясгалан “Цэцэнс майнинг энд энержи” компанийнхаа нэр дээр Хөгжлийн банкнаас 135 тэрбум төгрөгийн зээл авсан байна. “Цэцэнс майнинг энд энержи” компанид авсан зээлээрээ “Голомт” банкин дахь зээлээ дарсан нь зээлийг зориулалтын бусаар ашигласан асуудал юм.

Үүнээс гадна Х.Баттулгыг Ерөнхийлөгчөөр ажиллаж байхад Д.Баясгалангийн “Бодь интернэшнл” компани төрийн өмчит “Эрдэнэс тавантолгой”, “Тавантолгой төмөр зам” компаниудтай нүүрсний 3.5 их наяд төгрөгийн оффтек гэрээ байгуулсан зэрэг асуудлаар хууль хяналтын байгууллагын анхааралд өртөөд удаж байна. Өөрөөр хэлбэл, Х.Баттулга, Д.Баясгалан нарын нэгдмэл ашиг сонирхолтой этгээдүүд Хөгжлийн банк, нүүрс зэрэг олон их наяд төгрөгийн хулгайтай шууд холбогдож байгаа.

Харин Сингапурын хятад бизнесмэн Билли Лим Сим Пау нь Х.Баттулга, Д.Баясгалан нарын Монгол дахь хэд хэдэн компанид хувь эзэмшээд зогсохгүй оффшор данс, оффшор бүсэд бүртгэлтэй компаниудын гол эзэн юм.