Цагдаагийн ерөнхий газрын дэд даргаас ШШГЕГ-ын даргаар томилогдож буй О.Амарсанаа нь цагдаагийн гүйцэтгэх албанд олон жил ажилласан гуншинтай. Хэдийгээр энэ нь цагдааг шүүхийн шийдвэрт шилжүүлэн ажиллуулж байгаа энгийн томилгоо мэт боловч хууль зүйн шинжлэх ухаанд цагдаагийн алба, шүүхийн шийдвэр гүйцэтгэх албыг тэс өөр хоёр шинжлэх ухаан гэж салган судалж, мэргэшдэг болоод удаж байгаа. Бүр ШШГЕГ-ын яг эдлүүлэх, шүүхийн шийдвэр гүйцэтгэх гэсэн хоёр эрх үүргийг тус тусад нь байлгах тогтолцоо ч бий болчихсон. Тэгвэл цагдаагийн гүйцэтгэх албаар мэргэшсэн О.Амарсанаа ахынхаа нөлөөгөөр дахин нэг шинжлэх ухаанд суралцаж эхлэв.  Ерөнхийлөгч У.Хүрэлсүх 2017 онд Шадар сайдаас огцорч, Ж.Эрдэнэбатын Засгийн газрыг огцруулах акц эхлүүлэх үедээ “Өнөөдөр” сонинд “Миний садангийн дүү О.Амарсанаа “Таныг хууль бусаар мөрдөж, тагнах ажиллагаа хийгдэж байна” гэж надад анх хэлсэн” хэмээн ярилцлага өгч байлаа. Ийнхүү олны анхааралд орсон О.Амарсанааг Ерөнхий сайд У.Хүрэлсүх 2020 онд Экологийн цагдаагийн албаны даргаар, 2021 онд Цагдаагийн ерөнхий газрын дэд даргаар томилсон.

2008-2012 онд УИХ-ын гишүүнээр ажиллаж байсан Д.Загджав тухайд 2017 онд У.Хүрэлсүхийн дэмжлэгээр  Уул уурхай, хүнд үйлдвэрийн дэд сайдаар томилогдож байв. Мөн л 2020 онд найзынхаа дэмжлэгээр цэргийн цолоо сэргээлгэж, ШШГЕГ-ын дарга болсон. Ингэж У.Хүрэлсүх, Д.Загджав нар шүүхийн шийдвэр гүйцэтгэх албаны мерит зарчмыг цөм цохьсон. Улмаар 2022 оны долоодугаар сард Ерөнхийлөгч У.Хүрэлсүх Д.Загджавын мөрөнд генерал цол зүүсэн түүхтэй. Ерөнхийдөө У.Хүрэлсүх Д.Загджавын нарын улстөрийн урт удаан нөхөрлөлийн замналд казиногийн хэргээс эхлээд сайн түүх маруухан бичигдэж үлдсэн.