Монголбанкны тэргүүн дэд ерөнхийлөгч Г.Дөлгөөн УИХ-ын гишүүн, Хэнтий аймгийн Засаг дарга aсан Н.Ганбямбын өв залгамжлагч, “Хан хэнтий фракц”-ын нөлөөний албан тушаалтан гэдгийг улс төрийн хүрээнийхэн андахгүй. Өдгөө Ерөнхийлөгч, Ерөнхий сайд, Хууль зүйн сайдаас эхлээд хууль хүчний бүх байгууллагыг Хэнтийн фракцынхан толгойлж, доошоо удирдлага чиглэл өгч байгаа.  Хууль хяналтын салбарт бугшсан гэдэг хонгилыг өнөөдөр тус фракц удирдаж байна гэхэд болно. Тэд ЖДҮ сангийн хулгайгаас эхлээд Хөгжлийн банкны тонуул, нүүрсний мафийн хэргийг шалгахдаа, хэрэгтнүүдэд алагчилсан байдлаар хандаж байгааг олон хүн шүүмжлэх болсон. Тухайлбал, УИХ-ын гишүүн Т.Доржханд 2022 оны гуравдугаар сард Хөгжлийн банкны хэргийг УИХ-ын түвшинд хяналтаар сонсох үед “Хөгжлийн банкны захирлуудыг аваачиж хорьсон. Гэтэл заримыг нь аваад үлдчихсэн байна. Хөгжлийн банкны Эрсдэлийн удирдлагын газрын захирлаар олон жил ажилласан, Монголбанкны тэргүүн дэд захирал Г.Дөлгөөн гэдэг залуу байна. Шударга бус ийм нөхцөлд байцаалт явуулаад байна. Сугалах байдлаар таалагдсан хүмүүсээсээ байцаалт авдаггүй, таалагдаагүй хүмүүсээсээ байцаалт авдаг. Болохгүй, хамгаалах ёстой хүмүүсээ авч үлдээд байж болж байгаа юм уу” хэмээн прокурор, АТГ-ын дарга нараас асууж байлаа. Үүнд АТГ-ын дарга З.Дашдаваа “Нэр дурдагдсан хүн яллагдагчаар татагдаад явж байгаа” хэмээн мэдэгдэж байсан юм. Мөн Ерөнхий прокурор Б.Жаргалсайхан "Надад ирсэн мэдээллээр энэ хүн яллагдагчаар татагдсан" гэж хэлсэн нь бичлэг, хуралдааны протоколтойгоо байгаа.

Тэгвэл хамгийн сүүлийн мэдээллээр Хэнтийнхэн Г.Дөлгөөний хэргийг Хөгжлийн банкны бүлгийнхнээс тусгаарлаж, улмаар хариуцлагаас мултлах шатандаа орсон гэдгийг эх сурвалжууд мэдээлж эхлэв. Г.Дөлгөөн нь 2016-2018 онд Хөгжлийн банкны дэд захирал бөгөөд Эрсдэлийн үнэлгээ,удирдлагын газрын захирлаар ажиллаж байсан. Өөрөөр хэлбэл, Хөгжлийн банкнаас олгосон зээлүүдийн эрсдэлийг тооцож, дүгнэлт гаргах чиг үүрэгтэй гол албан тушаалтан байсан гэсэн үг. Г.Дөлгөөнийг уг албан тушаалыг хашиж байхдаа “Монгол драй милк” төслийн санхүүжилтийн барьцаанд гуравдагч этгээдийн буюу “Меланж” ХХК-ийн Дорнод аймаг дахь ашиг малтмалын тусгай зөвшөөрлийг барьцаалахад нөлөөлсөн гэдэг мэдээлэл бий. Гэвч өнөөдөр Г.Дөлгөөн Монголбанкны тэргүүн дэд ерөнхийлөгч буюу Хөгжлийн банкинд хяналт тавих эрх бүхий сүбъект болоод сууж байгаа нь өөрөө ашиг сонирхлын зөрчил юм.

Монголбанкны тэргүүн дэд ерөнхийлөгч Г.Дөлгөөний албан тушаал ханшсан байдал:

2020 оноос Тэргүүн дэд ерөнхийлөгч, Монголбанк

2018-2020 Гүйцэтгэх захирал, Төрийн банк

2016-2018 Дэд захирал бөгөөд ЭҮУГ-ын захирал, Монгол Улсын Хөгжлийн банк

2015-2016 Ахлах хянан шалгагч, Хяналт шалгалтын газар, Монголбанк

2010-2013 Хянан шалгагч, Хяналт шалгалтын газар, Монголбанк

2008-2010 Нягтлан бодогч, Төлбөр тооцоо бүртгэлийн газар, Монголбанк

Г.Дөлгөөн нь нягтлан бодогчоос Монголбанкны тэргүүн дэд ерөнхийлөгчийн албан тушаал хүртэл ердөө 10 жилийг зарцуулжээ.