Улсын бүртгэлийн мэдээлэл дээр “Капитрон” банкны эцсийн өмчлөгчийг Дашдэмбэрэлийн Бат-Эрдэнэ гэсэн байдаг. Түүний хөрөнгө орлогын мэдүүлэгт ч хувь эзэмшдэг тухай нь бий. Тэгвэл эх сурвалжийн мэдээлж буйгаар нүүрсний хэрэгт холбогдуулан “Капитрон” банкинд хуулийн байгууллагын шалгалт орсон аж. Энэ нь Д.Бат-Эрдэнийн хувь эзэмшдэг боловч бараг бүрэн хяналтаа тогтоодог гэгддэг орон нутгийн өмчит жижиг “Тавантолгой” компанийн асуудалтай холбоотой бололтой.

Эргэн сануулахад УИХ-ын гишүүн асан Л.Энхболд 2018 оноос эхлэн “Эрдэнэс Тавантолгой ХК-ийн Цанхийн Зүүн уурхайн урд хэсэг нь орон нутгийн жижиг Тавантолгой ХК-ийн дөрөвдүгээр уурхайн тусгай зөвшөөрлийн талбайн хойд хэсэгтэй уртрагийн 4831181 солбилцлоор огтлолцдог. Яг энэ огтлолцол дээр оршдог мөргөцгийг хулгайгаар олборлож 268 мянган тонн нүүрсийг хил давуулсан, хохирол нь 20 сая ам.доллар, олборлогч нь орон нутгийн жижиг Тавантолгой компани” хэмээн шүгэл үлээж эхэлсэн.

Түүний гаргасан мэдээллийн мөрөөр тухайн үеийн Сангийн сайд Ч.Хүрэлбаатараар ахлуулсан Ажлын хэсэг шалгалт хийж дүгнэлтээ Засгийн газарт танилцуулсан байдаг. Улмаар “Жижиг Тавантолгой компани Эрдэнэс Тавантолгой компанийн хилийг давж нүүрс олборлосон болох нь тогтоогдсон. Орон нутгийн Тавантолгой компанид ашиг сонирхлын зөрчилтэй гүйлгээ, хууль бус ийм үйлдлүүдийг тус компанид ноёрхлоо тогтоосон Таван толгой транс компани, түүний төлөөлөн удирдах зөвлөлийн дарга, эзэмшигч “Ажнай” Д.Бат-Эрдэнэ, Д.Дагвадорж нар хийж байж болзошгүй байна” гэж мэдэгдэж байв. Энэ бол оноор нь хөөвөл таван жилийн өмнөх явдал.

Тэгвэл 2022 оны 12 дугаар сарын 9-нд Засгийн газрын хуралдаанаас дээрх асуудлуудтай холбоотойгоор Орон нутгийн Тавантолгой компанид онцгой дэглэм тогтоож Хууль зүй, дотоод хэргийн яамны ТНБД П.Сайнзоригийг 6 сарын хугацаатай Бүрэн эрхт төлөөлөгчөөр томилсон юм. Түүнээс арваад хоногийн дараа буюу 2022 оны 12 дугаар сарын 19-нд Хан-Уул дүүргийн Эрүүгийн хэргийн анхан шатны шүүхээс “Тавантолгой Транс” ХХК-ийн гүйцэтгэх захирал Д.Дагвадорж, “МБМтранс” ХХК-ны гүйцэтгэх захирал Г.Мөнхдөл, “Зун Мен” ХХК-ны гүйцэтгэх захирал Ши Шао Хуа нарыг яллагдагчаар татаж, нэг сарын хугацаагаар цагдан хорих арга хэмжээ авч байв. Харин өдгөө хуулийн байгууллага шалгах хүрээгээ өргөсгөж “Капитрон” банкыг ч шалгаж эхэлсэн бололтой.