Хөгжлийн банкийг шалгах УИХ-ын түр хорооны гишүүн Ц.Даваасүрэн тус банкийг хүндрэлд оруулсан гол буруутнуудын нэг нь Сангийн сайд Б.Жавхлан гэдгийг зарлав. Үүнтэй зэрэгцэн Хөгжлийн банкнаас авсан зээлээ огт төлөөгүй компаниудын дотор Сангийн сайд Б.Жавхлангийн хамаарал бүхий “Чингис хаан банк” байгааг дахин зарлалаа. “Чингис хаан банк”-ны Хөгжлийн банкнаас авсан зээл 49.7 тэрбум төгрөгт хүрч, чанаргүй ангилалд багтаад удаж байгаа. Зээл авсан цагаасаа хойш эргэн төлөлт огт хийгээгүй байдаг. Тиймээс Сангийн сайдыг Хөгжлийн банкны өрөндөө Засгийн газраас баталгаа гаргуулах асуудлыг ирэх 2023 оны төсвийн төслийн хамт оруулж ирлээ гэдгийг УИХ-ын гишүүн Ц.Даваасүрэн мэдэгдсэн юм.

Төв банкнаас “Чингис хаан банк”-ийг төлбөрийн чадваргүй болж, дампуурах эрсдэлд орсныг анх 2020 оны эхэнд зарлаж байлаа. Тэгвэл “Чингис хаан банк”-ны үйл ажиллагаа түүнээс хавьгүй өмнө буюу 2018 оноос доголдож эхэлснийг харилцагчид нь гэрчилдэг. Гэвч Хөгжлийн банк 2019 онд төлбөрийн чадваргүй болсон “Чингис хаан банк”-нд 25 тэрбум төгрөгийн зээл олгосон. Ийнхүү дампуурах эрсдэлд орсон “Чингис хаан банк”-нд олон тэрбумын зээл олгосон асуудлыг Б.Жавхлангийн эхнэр А.Соёлмаатай холбон үздэг. Сангийн сайд Б.Жавхлангийн эхнэр А.Соёлмаа “Ньюгоби гэйт” компанийг “Чингис хаан банк”-ны хувь эзэмшигч Ц.Баярсайханы нөхөр Б.Батхүүтэй хамтран эзэмшдэг нь ил болсон.

Үүнээс гадна банкны өөр нэг хувь эзэмшигч Ш.Бүтэд нь Хөгжлийн банкны хэрэгт холбогдон албан тушаалаа өгсөн Барилга, хот байгуулалтын дэд сайд асан Ш.Лхамсүрэнгийн төрсөн эгч. Тухайн үед МАН-ын генсек, одоогийн Засгийн газрын Хэрэг эрхлэх газрын дарга Д.Амарбаясгалан Ш.Лхамсүрэнг Хөгжлийн банкнаас “Мондулаан трейд” компаниараа дамжуулан 17.8 тэрбум төгрөгийн зээл авсан гэдэг шалтгаанаар албан тушаалаас нь шахсан байдаг. Тэр дуулианы ард Сангийн сайд Б.Жавхлангийн эхнэр А.Соёлмаа “Чингис хаан банк”-тай хамааралтай гэдэг асуудал дарагдаад өнгөрсөн. Энэ нь Хөгжлийн банкнаас анх энэ оны нэгдүгээр сард чанаргүй зээлдэгчдийг зарлахад болсон явдал. Гэтэл түүнээс хойш “Чингис хаан банк” Хөгжлийн банкнаас авсан зээлээ огт төлөөгүй нь Сангийн сайд Б.Жавхлантай холбон үзэх үндэслэл болж байгаа юм. Тэгвэл Хөгжлийн банкны хэрэгт холбогдсон бүх хүнд хуулийн болон ёс зүйн хариуцлага тооцно хэмээн ам гарч байсан Д.Амарбаясгалан өнөөдөр ЗГХЭГ-ын дарга болоод Б.Жавхлантайгаа нэг танхимд сууж байна.

Үүнээс өмнө “Чингис хаан банк”-нд байршиж байсан Нийгмийн даатгал болон Эрүүл мэндийн даатгалын сангийн нийт 130 гаруй тэрбум төгрөг буух эзэн, буцах хаяггүй алга болсон байдаг. Өөр нэг тусдаа хэрэг бий гэсэн үг.