Гэвч гол нэрийн хүнсний бүтээгдэхүүн буюу сүржин үгээр хэлбэл стратегийн бүтээгдэхүүн болох гурилын үнэ нэмэгдсээр байтал төрийн бодлогын яам нь хуруугаа ч хөдөлгөсөнгүй. Ямар нэгэн мэдээлэл хийсэнгүй. Учир юун гэвээс эрх ашгийн зөрчилтэй сайд салбар удирдаж байгаад юм. Зүүн бүсийг гурилаар хангадаг “Дорнод гурил” гэж компани бий. Тэр компанийг өнөөгийн ХХААХҮ-ийн сайд Х.Болорчулуун үүсгэн байгуулж, 1997-2012 он хүртэл захирлаар нь ажиллаж байсан юм. Харин УИХ-ын гишүүн болсноос нь хойш өнөөг хүртэл хүүхдүүд нь ажиллуулж байгаа. Угтаа бол өөрийнх нь өмч хэвээрээ гэсэн үг. Ард түмэндээ чухам аминаасаа илүү хайртай хэмээн Ц.Даваасүрэн, С.Ганбаатар нартай дөрөө нийлүүлэн явдаг энэ эрхэм, ядарсан түмэн нь талх, гурилаа дийлэхээ байж буйг бол тэсэх ёстой зүйл гэж хардаг бололтой.

Ер нь бол илтэд ашиг сонирхолтой хүмүүсийг албан тушаалд тавьдаггүй жишиг бий. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль ч гэж байдаг. Тиймээс ч “Отгонтэнгэр” их сургуультай болохоор нь Д.Оюунхоролыг, “Аварга” дээд сургуультай учир Б.Бат-Эрдэнийг Боловролын сайд болгодоггүй учиртай. Тэр байтугай аав нь “Их Засаг” их сургуультай болохоор Н.Учралыг Боловсролын сайдаас хэдэнтээ буцааж байлаа. Гэтэл улайм цайм зүүн бүсийг тэр чигт нь атгачихсан гурилын үйлдвэртэй Х.Болорчулууныг УИХ-ын Байгаль орчин, хүнс хөдөө аж ахуйн байнгын хорооны даргаар ажиллуулж, улмаар Хүнс, хөдөө аж ахуй, хөнгөн үйлдвэрийн сайдаар ажиллуулдаг нь ямар учиртай юм бэ.

Энэ хүн өнгөрсөн дөрөвдүгээр сард УИХ-ын чуулганы хуралдааны үеэр “Дэлхий дээр өнөөдөр ийм хямдхан мах идэж байгаа, нэг ширхэг нь 1000 төгрөгийн талхтай, нэг килограмм нь 1000 төгрөгийн гурилтай газар байхгүй шүү гэдгийг би баталгаатай 100 хувь хэлнэ. Бид хөдөө аж ахуйгаа улам сайн дэмжих ёстой. Тэгж байж хөдөө аж ахуйдаа суурилсан хөнгөн хүнсний үйлдвэр хөгжих ёстой” гэж хуурай агсан тавьж байлаа. Талх 1000 төгрөг гэж бодож суудаг байх нь.  “Дорнод гурил” компани нь ЖДҮ-ийг дэмжих сангаас 950 сая төгрөгийн зээл авсан хэл ам нь ч бүрэн дарагдаагүй л явж байгаа биш бил үү. Тийм ч болохоор УИХ-ын гишүүн Х.Болорчулууныг гурил үйлдвэрлэгч нарын лоббигоор ХХААХҮ-ийн сайд болчихлоо гэж хардах хүн ч байгаа юм. Газар тариалан эрхлэгч Л.Цандэлэг бол их аймаар хэдэн гэр бүл байдаг талаар яриад байгаа харагддаг шүү. Эргээд сэдэв рүүгээ ороход Ерөнхий сайд Л.Оюун-Эрдэнэ өнгөрсөн дөрөвдүгээр сард үнийн өсөлтийн эсрэг шат дараалсан арга хэмжээ авахаа зарласан. Тэр үедээ үнэ бууруулж чаддаггүй юм гэхэд нэмэгдүүлэхгүй байхаар ажиллана гэж амлаж байв. Одоо танхим чинь, сайд чинь энэ чиглэлд ажиллахгүй байна, Ерөнхий сайд аа. Үнийн өсөлт иргэдийг чинь зовоож байна. Бас нэмээд асуухад гурил тансаг хэрэглээ биш биз дээ.