Нисванис хамтлаг жил бүр төрсөн өдрөө тохиолдуулан дөрөвдүгээр сард зохион байгуулдаг уламжлалт тоглолт “Нис нис”-ийн үеэр алдарт рокчин Амгаа түмний хэлдгээр “Оюук”-ыг дэмжээрэй гэж урлагийн алтан тайзнаас сонгуулийн сурталчилгаа “гусав”. Уг нь, тоглолтыг үзэгсэд дуртай хамтлагийнхаа дуртай дуунуудыг сонсох гэж очсон боловч хувь хүний улс төрийн үзэл суртлын ухуулгын хэрэгсэл болж орхив. Даан ч дээ!
Угтаа бол сонгуулийн сурталчилгааны тайз гэж бий! Тэнд манай урлагийнхан улс төрийн үзэл бодлоо чөлөөтэй илэрхийлж, дэмждэг хүнийг нь дэмжихийг сонгогч түмэнд уриалдаг ёсон буй за!

Амгаа эсвэл гэртээ суугаад лайв хийгээд ЕС-ийг дэмжээрэй гээд ярьсан ч болно шүү дээ, хэнд ч бухимдал үгүй! Урлаг уг нь элий балай романтизмаас ангид байвал сайн сан. Гэвч манайхан тэгж үздэггүй бололтой. Сошиалд хөвөрч байгаа мэдээллээс харахад зарим хүн Амгааг улс төр мэдэх ч үгүй. Мэдэх шаардлага ч үгүй гэх мэтээр бичжээ. Энэ бол иргэдийн шүтээн уран бүтээлч хийгээд улс төрийн талаарх үзэл бодлоо чөлөөтэй илэрхийлж буй жир нэг үзэгдэл л төдий. Байх ч ёстой жам ёсны л юм.

Саяхан даа, Фла гээд реппер залуу “Би Рокитбэйд дургүй. Та нар ч гэсэн түүнийг сонсохоо болиосой!” гэж нэг нэвтрүүлгээр яриад “Блаавгай” болтлоо нялга нүдүүлсэн. Энд юуг хэлэх гээд байна вэ гэхээр алдарт “Нисванисийн Амгаа” авгай/авгай гэж угтаа ахмад хүнийг гуайлах үг бөлгөө/ Монгол Улсын Ерөнхий сайд Л.Оюун-Эрдэнийг дэмждэг эсэх нь хэнд ч хамаагүй. Дэмжээрэй гэж бусдыг уриалах нь ч тэр хүний өөрийнх нь мэдэх хэрэг. Гэвч тэрхүү дэмжлэгийг хаана уриалах вэ гэдэг асар том ёс зүй улстөрчдийн ч дунд, урлагийнхны дунд ч чухал ойлголт. Сонгуулийн сурталчилгааны тоглолт гээд дээр дурдсан. Тэр тоглолтын тайзнаас хэн хэнийгээ дэмжээрэй гэж уриалж, сурталчлах нь бусдад хамаагүй. Гэвч тоостой гутлынхаа улаар гишгэхийг ч цээрлэдэг урлагийн алтан тайзан дээрээс нэн ялангуяа өөрсдийнхөө тоглолтын үеэр тэгж уриалах нь хаа, хаанаа буруу нь үнэн шүү дээ, үнэн!

Амгаа одоо дууг нь сонсох гэж очсоноос улс төрийн суртал ухуулгын өгөөш болох гэж очоогүй үзэгчдээсээ чин сэтгэлээсээ уучлалт гуйх хэрэгтэй! Болж өгвөл “Би дэмий юм донгосчээ" гээд тасалбарынх нь мөнгийг буцаах хэрэгтэй! Ёс зүйг хангуулах шаардлагатай байна.  

Сонгогчид минь сонсдог, сонгодог хоёроо ялгаж үзээрэй дээ, гуйя! Урлагийнхан ч гэсэн сонсдог, сонгодог хоёроо ялгаж, салгаг! Уг нь, цэр нь цээжиндээ, бөөр нь бөгсөндөө л гэдэг сэн!

Урлагийн хүмүүс уяхан л гэдэг. Гэлээ гэхдээ хөлчүүрхээд сэтгэл нь хөдөлсөн үү, эсвэл үгүй юү?! Алин ч бай тайзан дээрээс юу гэж ярихаа хаана ч, хэдийд ч мэддэг ухамсар, ёс зүй урлагт өчнөөн жил зүтгэсэн тууштай рокерт маань хэдийн суусан л баймаар юм даа! Түүний үнэнч фенүүдийг бодсондоо ийн мутарлавай.