Ерөнхийлөгч У.Хүрэлсүх өнөөдөр Онцгой байдлын байгууллагын 18 жилийн ойг тохиолдуулан зарлиг гаргаж Онцгой байдлын Ерөнхий газрын тэргүүн дэд дарга бөгөөд штабын дарга, хурандаа Жамсранжавын Чүлтэмсүрэн, Онцгой байдлын Ерөнхий газрын дэд дарга, хурандаа Лувсандоржийн Болдбаатар нарт Бригадын генерал цол хүртээв.

Гэвч энэ нь салбарын зарим мэргэжилтний эгдүүцлийг төрүүлж буй бололтой. Учир нь шинэхэн генерал Лувсандоржийн Болдбаатар нь Ерөнхийлөгч У.Хүрэлсүхийн эхнэр Тэргүүн хатагтай Лувсандоржийн Болорцэцэгийн төрсөн ах юм. 1981-1983 онд Украйн Улсын Одесс хотын Цэргийн нэгдсэн дээд сургуулийг Артиллерийн зэвсэглэлийн техник-механикч мэргэжлээр, 1989-1993 онд ОХУ-ын Пелза хотын Цэргийн их сургуулийг Пуужин-тийрэлтэт артиллерийн инженер мэргэжлээр төгссөн энэ хүн 2004 оныг хүртэл цэргийн ангид салаа, салбарт захирагч, Пуужин-артиллерийн зэвсэглэлийн албаны дарга, Зэвсэг техник хадгалах баазын дарга хийж байгаад 2004 оноос ОБЕГ-т Төрийн захиргааны удирдлагын газарт хүний нөөцийн сургалт, нийгмийн хамгааллын асуудал хариуцсан мэргэжилтнээр орсон байна. Түүнээс хойш албан тушаал өгсөж ахлах  мэргэжилтэн, хэлтсийн дарга, газрын дарга зэргээр тушаал дэвшсээр өнгөрсөн хоёрдугаар ОБЕГ-ын дэд дарга болсон бол өнөөдөр Бригадын генерал боллоо. Сонирхолтой нь, түүний ОБЕГ-т орсон 2004 онд Ерөнхийлөгч У.Хүрэлсүх Засгийн газрын гишүүн, Онцгой байдлын асуудал эрхэлсэн Монгол Улсын сайдаар ажиллаж эхэлсэн байдаг. Мөн 2014-2015, 2016-2017 онд Монгол Улсын Шадар сайдаар ажилласан. Тэгвэл Л.Болдбаатарын хувьд хэлтсийн даргаар ажиллаж байснаа 2015 оноос ОБЕГ-ын Захиргаа удирдлагын газрын дарга болсон байгаа юм. Хүргэнийх нь албан тушаалд очсон онуудад өөрийнх нь өгсөж дэвжихтэй давхцаад явсан нь сонин юм шүү.

Харин ОБЕГ-ын Тэргүүн дэд бөгөөд штабын дарга Бригадын генерал Ж.Чүлтэмсүрэн нь Ерөнхийлөгч У.Хүрэлсүхтэй цэргийн сургуулийн найзууд гэдэг хэл ам дагуулдаг. Ж.Чүлтэмсүрэн 1985-1989 онд Цэргийн нэгдсэн дээд сургуулийг Цэргийн улс төрийн ажилтан, 1994 онд Засгийн газрын дэргэдэх Удирдлагын хөгжлийн институтийг Төрийн удирдлагын менежерээр тус тус төгссөн. Ерөнхийлөгч У.Хүрэлсүхийн намтарт 1985-1989 онд Батлан хамгаалахын их сургуулийг улс төр судлаач, 1994 онд Төрийн захиргаа, удирдлагын Хөгжлийн Институтийг төрийн удирдлагын арга зүйч мэргэжлээр төгссөн гээд байж байна. Ажил мэргэжлийн хувьд цэргийн ангид, ЗГХЭГ-т, Элчин сайдын яаманд консулын туслах ажилтан, “Эм-Эм-Пи” ХХК-ийн захирал гэж явсаар 2008-2017 онд Нийслэлийн Онцгой байдлын газарт Ахлах мэргэжилтэн, Захиргааны удирдлагын хэлтсийн дарга, 2017-2020 оны 08 дугаар сар хүртэл НОБГ-ын дарга, 2020 оны 08 дугаар сараас ОБЕГ-ын тэргүүн дэд бөгөөд штабын даргаар томилогдон ажиллаж байна.