Аудитын газраас Нийслэлийн 2021 оны нэгдсэн төсвийн гүйцэтгэлд аудит хийж тайлангаа нь НИТХ, Нийслэлийн Засаг дарга Д.Сумьяабазар нарт хүргүүлжээ. Тайланд дурдсан баримтуудаас нэг жишээ дурдахад, нийслэлийн ИТХ, дүүргийн ИТХ-ын төлөөлөгчид олон нийтийн зүгээс шүүмжлэл дагуулсаар ирсэн урамшууллын мөнгийг цар тахал тохиож, улс орон даяар хэмнэлтийн горимд шилжсэн 2021 онд ч үргэлжлүүлэн авчээ. Нийслэлийн ИТХ-ын 45 гишүүн өөрсдийгөө 2 тэрбум орчим төгрөгөөр урамшуулал авсан бол нийт дүүргүүдтэй нийлээд 7.5 тэрбум төгрөгийг төлөөлөгчийн хуралд суусан шагнал хэлбэрээр олгосон байна. Нийслэлийн ИТХ-ын төлөөлөгчдийн урамшуулал жил ирэх бүр нэмэгдэж байгаа тухай шүүмжлэл тасардаггүй. Тэгвэл энэ нь өссөөр НИТХ-ын нэг төлөөлөгч жилд 46 сая төгрөгийн урамшуулал авдаг бол дүүргийн ИТХ-ын төлөөлөгч 20 орчим сая төгрөг авдаг болжээ.

Уг мөнгийг ИТХ-ын төлөөлөгчид тойрогтоо ажиллахдаа чухам юунд зарцуулж байгаа нь тун ч тодорхой биш явсаар ирсэн. Ямар ч байсан цар тахлын хорио дэглэмд өнгөрүүлсэн 2021 онд жилдээ 15 орчим удаа хуралд суудаг НИТХ-ын төлөөлөгчид 46 сая төгрөгийн урамшуулал хүртсэн байгаа юм. Өнгөрсөн дөрөвдүгээр сарын 20-ны өдрийн нийслэл дэх Аудитын газрын дарга, Тэргүүлэх аудитор М.Эрдэнэжаргалын бичигт “Аудитаар илэрсэн зөрчлүүдийг арилгах арга хэмжээг зохион байгуулж, үр дүнг 2022 оны 10 дугаар сарын 1-ний дотор хариу мэдэгдэхийг Нийслэлийн Засаг дарга бөгөөд Улаанбаатар хотын захирагч (Д.Сумъяабазар)-д зөвлөсүгэй” гэжээ. Тус тайланд ямар зөрчлүүд тусгасныг манай сайт цувралаар хүргэх болно.