Нэг их шинэ мэдээ биш. Өсөх нь ч тодорхой байсан. Тэгээд өссөн. Энэ оны дөрөвдүгээр сарын байдлаар улсын хэмжээнд инфляц 8.6 хувьтай гарлаа. Үүний өмнөхөн олон улсын санхүүгийн байгууллагууд Монгол Улсын инфляц өснө гээд тодорхойлчихсон юм л даа. Хамтарсан нэртэй хатирсан Засгийн газар дөнгөж байгуулагдсан өнгөн дээрээ инфляцыг 5 хувь дотроо барина гэж тооцсон. Тооцоо буруу байжээ. Эрчим хүчний реформ нэрээр цахилгааны үнэ нэмсэн нь инфляц өсөхөд нөлөөлж. “Эрдэнэс-Тавантолгой” ХК-ийн ногдол ашиг тараасан нь нөлөөлж. Нөлөөлөхдөө хүнсний үнэ 6.8 хувиар нэмэгдэж. Ажил, үйлчилгээний үнэ 17 хувиар огцом өссөн нь нөлөөлж. Монголбанкны зорилтоос ч инфляц даваад явчихлаа. Тийм ч учраас мөнгөний бодлогын хороо бодлогын хүүг хоёр нэгж хувиар нэмж, 12 хувьд хүргэсэн. Ингэснээр 2024 оны эхнээс хойш зөөлрүүлэх чиглэлтэй байсан мөнгөний бодлого эргэн чангарч байна. Яг жилийн өмнө бодлогын хүү өнөөдрийнх шиг буюу 12 хувьтай байхад инфляц хэдэн хувьтай байсан гээч. Долоон хувьтай байсан юм. Одоо хэд байгааг нийтлэлийн эхэнд дурдсан шүү дээ, 8.6 хувь байгаа гэж.

Засгийн газрын нэг шийдвэр нөгөө шийдвэрээ үгүй хийдэг. Эхлээд тэд инфляцыг дөрвөн жилдээ 5 хувьд барина гэсэн. Дараа нь цахилгааны үнийг нэмсэн. Инфляцад нэгэнт нөлөөлөөд эхэлчихсэн учраас дулааны үнийг нэмэхээ хойшлуулсан. Ер нь ч дахиад хойшлуулах биз. “Эрдэнэс Тавантолгой” ХК-ийн ногдол ашиг тараахыг битгий улстөржүүлээд бай, хувьцаат компани ашгаа тарааж байгаа явдал гэж ам тагласан. Гэтэл яасан. Иргэдийн гар дээр “бэлэн мөнгө” очиж, хүнсний бараа бүтээгдэхүүний үнийг нэмж орхисон. Ногдол ашиг нь үндсэндээ ногдол нулимс болоод дууссан нь данх пургитал шүгэлдсэний гавьяа.

Инфляц өсөхөд иргэдийн хэрэглээний зээл нэмэгддэг бичигдээгүй хууль буй. Иргэдийн нуруун дээр ачаа нэмэгдэнэ гэдэг нь чухамдаа үүнийг хэлээд байгаа юм. Нэгэнт мөнгөний бодлого чангарч байгаа учраас хэрэглээний зээлийг хумих бодлого Төв банк баримтална. Манайх ч ялгаа байхгүй. Банкнаас иргэдэд шинээр олгох болон нөхцөлийг нь өөрчлөх хэрэглээний зээлийн өр, орлогын харьцааг 50 хувьд тооцлоо. Ингэснээр зээл авах бүр л хүнд болно гэсэн үг. Хоёрдугаар сарын байдлаар банкны салбарын нийт зээлийн үлдэгдэл 37 их наяд төгрөг байна. Үүний 60 хувийг иргэдийн хэрэглээний зээл бүрдүүлж байгаа. УИХ одоо нэг их сайн хүний дүр эсгэх гээд зээлийн мэдээлийн тухай хууль хэлэлцээд байна аа даа. Энэ нь бодит байдалтайгаа нүүр тулсаны цондон. Асуудал бишдээд эхэлснийг мэдмэгцээ зээл мэддэг болж харагдах гэж байгаа нь энэ. Хэрэв одоо л мөнгө, сангийн бодлогоо зөв барихгүй бол бишдээд ирмэгцээ байдгынхаа баруун хаяаг /ОУВС/ бараадах вий.