Уншигч та бүхэн анзаараад хараарай. Үсээ толийтол самнаад зангиа шахсан ах, гоё хувцас өмссөн эгч нар "сошлоор" дүүрэн болж уу? Гэнэт л номж уншдаг болж, хоолны шоунд орох хэмжээний хоол хийдэг ээ гайхуулж байна уу? Бүр эсвэл “ард түмэн” гэж цээжээ дэлдээд, ядарч байгааг нь гайхаад, тэнд оч гарвал л үсэрч очоод наалдаж байна уу? Оношийг нь та бараг гадарласан байх. Сонгуулийн үнэр ханхийсэн хавар цагт горилогчдын гороо эхэлсэн нь тэр.

Энэ жилийн сонгуульд горилогчид олширох нь аргагүй. Ордонд суух гишүүдийн тоо нэмэгдэж, тойрог томорсон. Ордонд 126 гишүүн суух тул горилогчид мэдээж “даблдаж” таарна. Нам нь тодотгосон ч бай, өөрийгөө тордсон ч бай хамаагүй олонд танигдаж байж суудалдаа залрах тул одоо юугаар ч хамаагүй танигдах шаардлага, хэрэгцээ урган гарч ирнэ. Эрх барьж байгаа намыхан, сөрөг нэртэй сөрөх хүчнийхэн ч яахав хүч, хөл хоёроороо танигддаг юм байж. Тэгвэл парламентад суудалгүй намынхан яахав, тэд ч бас танигдахыг хүснэ биз дээ. Тиймээс л яаж ч байсан хамаагүй танигдах хэрэгцээ гарч ирээд байгаа юм.

Гадаадад сурсан, хулгайчийг ол гэж бахирсан, ядарч байгааг халагласан, нийтлэл бичиж тодорсон, ухаан ярьж цэцэрхсэн, боловсрол ярьж гоёчилсон, стильтэй гэдгээ гайхуулсан, жендэр ярьж өрөвдүүлсэн, мал тоолж цодойсон горилогчдын тоо цөөнөөр тогтохгүй ихэснэ. Гэхдээ хүмүүс учир мэддэг болсныг горилогчид лав анзаарсангүй. Тэднийг гороолж байх хооронд Үндэсний аудитын газраас нам, эвслүүдийн мөрийн хөтөлбөрийг буцааж орхив. Шаардлага нь “мангар” байж болох ч бүгдийг нь буцаана гэдэг нь нэг зүйл хэлээд байгаа хэрэг. Олон жил баян болгоно гэж уриалсан нь өдгөө нэг эвслийн уриа болж, эрх баригчид нэг хүнд ногдох ДНБ-г 10000 болгоно гэж сайрхан, АН үндсээр нь өөрчилнө гэдгээ тунхаглаад, жижиг намууд Монголыг аврахаар хичээж байна. Нийгмийн цөөн ч болтугай хэсэгт танигдсан дүрээр Ерөнхий нарийнаа хийлгэж байгаа ч нам байна. Горилогчид одоо сайхан харагдаж, гоё үг хэлж байж болох ч тоглоомын дүрмийг эрх баригчид яг одоо хэлэлцэж байгааг саначихад гэмгүй.

УИХ-ын чуулганы болон УИХ-ын чуулганы дэгийн тухай хуулийг шинэчлэн хэлэлцэж байгаа нь ерөөс тоглоомын дүрмийг тодорхой болгох гээд байгаа л хэрэг. Гишүүд асуулт, асууж үг хэлэхийг Бүлгийн хуралдаанаар шийдэж, арай мэддэг нэгнээр үгээ хэлүүлэх сонголт яригдаж байна. Нэг ёсондоо их мэдэгчдийг “арчих” нэг гаргалгаа. Гэхдээ иргэдийн тодорхой хэмжээний төлөөллөөр парламентад суусан гишүүдийн үг хэлэх эрхийг хязгаарлаж байгаа юм биш биз гэсэн асуулт гарч ирнэ. Бодлогоор бодлоо ярьдаг хүмүүсийг болиулж байгаа тул горилогчид гоё үг хэлсэн ч микрофоныг нь хаах гэж байгаа гэдгийг сонгогчид ойлгох учиртай.