Иргэн Г.Ган-Очир  УИХ-ын гишүүн Ж.Ганбаатарыг төрийн эрх мэдлийг хууль бусаар авсан талаарх нотлох баримтыг АТГ, ТЕГ, УИХ-ын Ёс зүйн байнгын хороонд шалгуулахаар өгч буйгаа мэдэгдлээ. Тэрбээр “Ж.Ганбаатар МАН-д 2 тэрбум төгрөг өгч, УИХ-д сонгогдсон гэдгээ яриан дээрээ хүлээдэг. Түүнийг нь АТГ-т хүлээлгэж өглөө. Мөн Баянгол дүүргийн орон нутгийн сонгуулиар сонгогдсон хүмүүсийг мөнгө өгөн, өөртөө урвуулах замаар төрийн эрхийг хууль бусаар авахдаа Э.Магнайбаярт 500 сая төгрөг өгөхөөр тохиролцоод, урьдчилгаа болох 200 сая төгрөгийг өгсөн гэдгийг нотлох баримтаар баталгаажуулсан. Би 2020 оноос эхлэн Баянгол дүүргийн МАН-ын даргыг тагнуул болон эрүүгийн цагдаад өгсөн. Тангуулын байгууллага тухайн хэргийг хохирогчгүй гэж хаагаад байгаа учраас баримтыг бага багаар өгч байна. Баянгол дүүргийн МАН-ын дарга Ж.Ганбаатар үүнийг зохион байгуулсан. Уг нотлох баримтад гишүүн 2024 онд бүр их мөнгө төлөөд тойрогтоо дахиад гарч ирнэ гэж буюу хууль бусаар ялалт байгуулна гэдгээ маш тодорхой хэлсэн. Баримтууд нь Тагнуулын ерөнхий газар дээр байгаа. Тагнуулынхан миний хүсэлтийг хүлээж авдаггүй ч 491 дүгээр хорих ангид барьж хориод, аавыгаа болон хоёр хүүхдээ бод гэж дарамталсан. Сөрөг тагнуулынхны дарамтаас хойш 25 хоногийн дараа миний аав өнгөрсөн. Саяхан хоёр хүүхдийн бие гэнэт муудаад, эмнэлэгт хэвтээд гарсан. АТГ-т энэ талаар хандахаар шалгаж өгдөггүй. Над дээр эрүүгийн 15 хэрэг тохсон. Надад Хүний эрхийн комисс, цагдаа, тагнуул, АТГ гээд хандаагүй газар байхгүй. Сүүлдээ олон улсын байгууллагад хандсан. Миний хувьд өмнө нь МАН-ын гишүүн байсан. 2020 оны сонгуулиар МАН-д ажилласан" гэлээ.