Өнгөрсөн долоо хоногт олон мянган иргэн Төв талбай дээр үнийн өсөлтийг эсэргүүцэж, төрийн хэмнэлт шаардан хоёр хоног жагссан. Тэгвэл энэ үеэр УИХ-ын гишүүн Б.Батжаргал, Д.Батлут, Г.Ганболд, Ц.Идэрбат, Н.Наранбаатар, Ц.Сандаг-Очир, Т.Энхтүвшин нар Зөрчлийн хуульд заасан торгуулийн хэмжээг 50 хувиар нэмэгдүүлэх асуудал санаачилж, УИХ-аар хэлэлцүүлж байлаа. Тэд өнгөрсөн сард Зөрчлийн хуульд өөрчлөлт оруулах хуулийн төслийг УИХ-д өргөн мэдүүлсэн. Уг хуулийн төсөлд заасан хугацаанд төлөөгүй бол торгуулийн хэмжээг 50 хүртэл хувиар нэмэгдүүлэх заалт багтаажээ. Ингэснээр шийтгэлийн төрөл нэмэгдэж, торгуулийг хугацаанд нь төлүүлэх хөшүүрэг болно гэж үзсэн байна. Өөрөөр хэлбэл, торгуулийн төрлийг олшруулж, төлбөрийн хэмжээг нэмэгдүүлснээр улсын төсөвт оруулах мөнгө нэмэгдэнэ гэсэн үг. Дээрх зургаан гишүүн уг санаачилгыг гаргахдаа, зарим төрлийн зөрчилд оногдуулах торгуулийн хэмжээг бууруулна. Зөрчлийн хуулиар шууд торгох шийтгэлийг урьтал болгодгийг залруулан, эхний удаа “Сануулах”, үүний дараа “Торгох” гэсэн зарчмыг баримтална хэмээн сурталчилж байсан юм. Гэтэл “Засаг дарга” нарын санаачилсан хуулийн төслийн гол зорилго нь   торгож, шийтгэх санкц буюу хариуцлагыг хүндрүүлэх байжээ. УИХ-ын Хууль зүйн байнгын хороо өнгөрсөн долоо хоног уг өөрчлөлтийг дэмжиж, чуулганы нэгдсэн хуралдаанаар хэлэлцүүлэхээр болсон. Б.Батжаргал, Д.Батлут, Г.Ганболд, Ц.Идэрбат, Н.Наранбаатар, Ц.Сандаг-Очир, Т.Энхтүвшин нар бүгд аймаг, дүүргийн Засаг даргаар ажиллаж байгаад, 2020 оны сонгуулиар УИХ-д сонгогдсон   гишүүд. Б.Батжаргал УИХ-ын гишүүн болохоосоо өмнө Төв аймаг, Д.Батлут Орхон аймаг, Г.Ганболд Өвөрхангай, Ц.Идэрбат Хэнтий, Н.Наранбаатар Өмнөговь, Ц.Сандаг-Очир Багануур дүүрэг, Т.Энхтүвшин Дорноговь аймгийн Засаг даргаар ажиллаж байлаа. Энэ утгаараа ард иргэдийн амьдралыг хамгийн сайн ойлгох гишүүд хэмээн тодорхойлогдож байв. Гэвч тэд энэ удаад эдийн засгийн хямралын үеийн хэмнэлтийг өөрсдөөсөө бус зөрчлийн торгуулийн хэмжээг нэмэгдүүлэх санаачилга гаргав. #ӨӨРСДӨӨХЭМНЭ