Шинэ Зеландын холбогдох шүүхээс хар тамхины хэргээр Монгол Улсад саатуулагдаж байгаад батлан даалтад гармагцаа тус улсад дүрвэсэн Монголын харьяат иргэнд хамгаалалтад авахаар шийдвэрлэжээ. Энэ тухай “Шинэ Зеланд Херальд” сонинд мэдээлсэн байна. Хэдийгээр Цагаачлал болон Хамгаалах асуудал хариуцсан шүүх тухайн иргэний хар тамхи үйлдсэн, эс үйлдсэнээс үл хамааран хамгаалалтад авахаар шийджээ.

Тухайн иргэнийг дүрвэгдэгсдийн ангилалд багтаах боломжгүй гэж үзсэн ч Монгол Улсад нэвтрэхэд эрүүдэн шүүх магадлалтай тул олон улсын конвенцийн дагуу түүнийг “хамгаалагдсан хүн” гэж тогтоожээ.

Шинэ Зеландын Цагаачлалын болон хамгаалах асуудал хариуцсан шүүх тухайн шийдвэрт иргэний нэрийг дурдаагүй “А.Г.” гэж товчилсон байна. Тэрээр 2019 оны дундуур Улаанбаатараас Шинэ Зеланд улсад зочлох визээр нэвтэрчээ. Тухайн үедээ тэрээр дүрвэгч эсвэл хамгаалагдсан хүний статус авах хүсэлт гаргасан ч Шинэ Зеландын цагаачлалын албанаас татгалзсан байна. Улмаар тэрбээр энэ талаар мэргэжсэн шүүхийн комисст хандсан юм. Шүүхээс түүнийг эх орондоо хар тамхины наймаа хийсэн гэх хилс хэрэгт буруутгагадж, хүний эрх зөрчигдөх эрсдэлтэй гэж үзэн “хамгаалагдсан хүн” гэх статус олгожээ.

Тухайн үед "А.Г"-г  хөрөнгө чинээ, нөлөөтэй хүмүүсийн оролцоотойгоор татан оролцуулсан бөгөөд авлигад идэгдсэн шүүх, цагдаагийн байгууллагад итгэхгүй байгаа тухай мэдүүлжээ. Тухайн “А.Г” гэх хүн нь мөс буюу метафетамин наймаалсан хэргээр буруутгагдаж байжээ. “Шинэ Зеланд Херальд” сонинд дурдсанаар “А.Г” гэгчтэй хамт хэрэгт холбогдсон хүний ар гэрийнхэн нь дарамталсан бөгөөд цагдан хоригдож байхдаа дарамталсан байна. Цагаачлал болон Хамгаалах асуудал хариуцсан комиссийн шийдвэрт “тухайн иргэнд хэрэг хүлээлгэхдээ сэтгэл санааны болон бие махбодын дарамт учруулах үндэслэлтэй” гэдгийг тодотгожээ.